كلشي جاي اشوف بعيونك وادري ما تعود اضعونك وادري.....يبني تضل ض | الشاعر عباس الفرطوسي الكربلائي
كلشي جاي اشوف بعيونك
وادري ما تعود اضعونك
وادري.....يبني تضل ضامي
............
لا تخفي عني دمعتك ولتكابر اعرف نيتك
ابجي ييمه لغربتي وادعني وامشي لغربتك
يوليدي كلبي مكطع ومجسوم نصين
بس جاي أكابر حته ما تنهضم يحسين
لا تضن يهون امصابك
يبني راح أضل يم بابك
بلكي.... تتحق احلامي
.............
ادري تروح ومنحرك شما اصدله اشوفك تنذبح
وشما اشبكنك احس جن نابت بصدرك رمح
والزم يمينك والكه خنصر منهه مكطوع
وانضر قميصك ناكع من الدم والدموع
وشهادت ييمه وليدك
ينذبح صريع بايدك
مثلك......... هم ينذبح دامي
................
يبني اشوف بنضرتك غربه عيالك والعطش
وبعينك انرسمت الي زينب تون ليل اهدعش
وتصعد عله التل وتنادي يا ضوه العين
ان كنت حياً أدرك اختك خويه يحسين
هجمت الخيول اعليها
وهيه عالركض ما بيها
تنادي..... احترت اخيامي
.............
كل يوم اشوفك مبتسم واليوم متكتر تون
وكلسا تكلي ابنيتي عينيها يمه اعله الحزن
وكلما تصد لعليلتك تشبكها وتنوح
جنك تكلها راح اضل بالحومه مذبوح
وهيه تصرخ اترجاكم
بويه خلي امشي وياكم
وانسه...... يابويه آلآمي
..................
كضيت عمري بخدمتك ولامرك اني طايعه
تجازيني هالمره ردت وتاخذ بنيني الاربعه
تلاثه اعتبرهم لم حسن مني هديه
وعباس ناذرته نذر للهاشميه
روحي والنفس وبنيني
كلها فدوه الك يحسيني
مقصره....... من جدمي الهامي
.........................
ما ادري اموت بغيبتك لو ابقه أتاني اعله الدرب
مدري امشي ممشه ويه الضعن لو اودي وياك الكلب
يوليدي ما ادري شسوي بساعة اجفاك
امنيتي روحي لو رحت تأخذها وياك
وتبقه عالطريق اعيوني
تبجي عالذي عافوني
واغفه...... وتخلص ايامي
عباس الفرطوسي الكربلائي
