بويه لا تبجي وتهيج جمرتي حير بامرك واني احير بعلتي ـــــــــــ | الشاعر عباس الفرطوسي الكربلائي
بويه لا تبجي وتهيج جمرتي
حير بامرك واني احير بعلتي
ــــــــــــــــــــــــــــــــــــــ
حير بامرك واني اضل بالدار انوح
وراح افكن خاطري واتنه الجروح
كلبي ما يطيني اكلك لاتروح
خاف ابجي وتنهضم من دمعتي
ــــــــــــــــــــــــــــــــــــــ
راح ابقه مكابره لمن تمر
خاف تلمح دمعتي ودمعك يدر
بويه كلشي ولا اشوفك منكسر
بكسرتك تكبر يبويه كسرتي
ــــــــــــــــــــــــــــــــــــــ
ليش اشوفن دمعتك عالخد تسيل
وليش بالممشه لمن تجبل تميل
ادري يابويه نويت اعله الرحيل
المن اتنوح وتهيج حسرتي
ــــــــــــــــــــــــــــــــــــــ
ادري مالك نيه تاخذني وتروح
وادري راح ابقه بغربتي انحب وانوح
روح يالغالي يبعد اعيوني روح
وانه ادعي لغربتك ولغربتي
ــــــــــــــــــــــــــــــــــــــ
صح اكابر والدمع ما انزله
وعود ما مهتمه لامر القافله
لجن ودي وياك اروح الكربله
وحالي حال الحرم تنصب خيمتي
ــــــــــــــــــــــــــــــــــــــ
بويه والينشدني عن حال الضعون
شرد اكله بياعذر واسكت شلون
بسفره اهلنه بعد جم يوم ويجون
هيه سفره لجن بيها مصيبتي
ــــــــــــــــــــــــــــــــــــــ
شلون لو خطاركم ليكم حده
ويلكه بيبان المضيف مسدده
هوه ينشدني وارد اني انشده
وين اهلنه كلي وارحم حالتي
ــــــــــــــــــــــــــــــــــــــ
ياجبير الكوم يالدومك جبير
اخلاف جفك ياهو بمجانك يصير
ياهو اليسكتني لو حان المسير
ياهو يشبكني ويحبني بهامتي
عباس الفرطوسي الكربلائي
