حدوتة النهاردة .... . ( اوضة يوسف ) كان ياماكان كان في ز | تربيه جيل الأمه

حدوتة النهاردة .... .

( اوضة يوسف )

كان ياماكان كان في زمان ولد شقي اسمه يوسف ..... كانت مامته دايما بتشتكي منه انه مش بيرتب اوضته ......و كل ما مامته ترتب الاوضه الصبح بعد ما يوسف يروح المدرسة و ترجع كل حاجه مكانها.... ......اول ما يوسف يرجع من المدرسة يقلب الاوضه في ثواني ......يرمي التيشيرت علي السرير و البنطلون علي الكرسي و الشوز تحت المكتب و الالعاب بتاعته يرميها علي الارض ....... ..دة غير كتبه و كراساته اللي مش متنظمة علي المكتب و الورق اللي مالي المكتب .......مامته تعبت من الكلام معاه انو لازم يحافظ علي نظافه اوضتة .......وانو كبر و المفروض يرتب اوضته بنفسه كمان ...... لكن يوسف مكنش بيسمع الكلام خالص ...... و في يوم صحي يوسف وراح المدرسة عادي لكن مامته خرجت بدري و ملحقتش ترتب اوضته زي كل يوم لان كان وراها مشوار مهم و قالت لما ارجع هرتبها...هيكون يوسف لسه مرجعش من المدرسة ..... .وصل يوسف للمدرسة و هو طالع علي السلم و بيتكلم مع واحد صاحبه و مش واخد باله ....رجله اتزحلقت ووقع علي السلم واتعور في راسه...... .راح المستشفي و نضفولوا مكان الجرح و ربطوه كويس .....و اتصلوا بمامته جت اخدته و روح البيت ......و بعد ما اليوم الدراسي خلص قرر اصحابة في الكلاس كلهم انهم يستئذنوا من اهلهم و يروحوا يزوروا يوسف صاحبهم في البيت ...... عشان يطمنوا...... عليه ..... خبطوا الباب فتحتلهم مامته و طلبوا منها انهم يشوفوا يوسف .......دخلوا اوضه يوسف و دي كانت المفاجأه ليوسف .... بقي محرج جدا من نفسه اصحابة استغربوا جدا لما شافوا اوضة يوسف مش مترتبة كل ركن في الاوضة مليان كراكيب و العاب و ورق و سريره مش متروق و الكتب مش متنظمة علي المكتب .... لدرجه ان اصحابوا مبقوش لاقين مكان يقعدوا فيه .....فضلوا واقفين ....سلموا علي يوسف و اطمنوا عليه و ادولوا الورد اللي كانوا جايبنهولوا و استئذنوا و مشيوا ...........و اول ما خرجوا يوسف قعد يعيط دخلت عليه مامته لاقيته بيعيط قالتلوا مالك يا حبيبي انت تعبان حاسس بحاجه.. الجرح اللي في راسك بيوجعك ...... قالها لا يا ماما ان مكسوف من نفسي جدا....ان اصحابي جم علي فجأة و شافوا اوضتي و هي مش مترتبة شكلي بقي وحش اوووي قدام اصحابي .....دلوقتي هيقولوا لكل اصحابي و المدرسين و هيقولوا عليا اني ولد مهمل و اوضتي مش متنظمة ..... مامته قالتلوا انا قولتلك الكلام دة كتير قبل كدة ......علي العموم اعتبر ان دة كان درس ليك عشان تتعلم ان دايما تحافظ علي نظافه اوضتك و ترتبها دايما و تحط كل حاجه في مكانها ....... قالها كان عندك حق يا ماما يا ريتني سمعت كلامك قبل ما اتحط في الموقف السخيف دة ........و من ساعتها فعلا بقي يوسف بيرتب سريره و اوضته اول ما يقوم من النوم ....... و توته توته خلصت الحدوتة حلوة و لا ملتوته ...??????