كنت ماشيه ف الشارع انا وانس حبيبي وبمشّيه وهو اللهم بارك بقا ي | تربيه جيل الأمه
كنت ماشيه ف الشارع انا وانس حبيبي وبمشّيه وهو اللهم بارك بقا يمشي ومش محتاج حد يشيله، فزمزء واحنا في الشارع وعايزني اشيله، ماكناش مشينا كتير اصلا بحيث اني اقول انه تِعب ومحتاج يتشال.. وقفت اطلب منه انه يمشي معايا وحفزته، ولمالقيته بيتدلع مشيت خطوة قدام "علما بإننا كنا عالرصيف" وقلتله مش هشيلك، لقيته بيقعد عالارض بزعل كدة ومقموص، وبدأ يضغط عليا بعياط
انا عارفه انه بفضل الله مش تعبان، وماعملش مجهود يتعب بسببه والحمدلله عارف يمشي فتجاهلت اسلوبه وطلبت منه تاني انه يمشي
واثناء ماهو عالارض لقيت واحد لااعرفه ولايعرفني ماشي جمبي وبيقول"امهات آخر زمن، قوم ياحبيبي روح لماما عشان هي مش فاضيه تجيلك" وراح مشي..
كنت قاعدة مع صاحبه ليا وانس بيلعب فعايز يخرج برة الاوضه وبيقوللي "باي" فقلتله باي وبعدها قلتله (السلام عليكم) بحيث انه يربط برضوا السلام عليكم ب الخروج والدخول وهكذا.. لقيتها بتبصلي وبتقوللي:- مش أوي كدة يعني، اللي هو ماتحبكيهاش
متعودة لمابشتري لأنس هدوم جديدة بقولله دعاء لبس الثوب الجديد، فمرة كنت بقيّسه تي شيرت وعجبني في المحل فقلت خلاص مش هقلعهوله وهروح بيه وبقولله الدعاء لقيت واحدة جمبي بتقوللي:- ودة هيفهم دة؟ ماتعقديهوش ياحبيبتي عشان يتقبل منك بعدين.
الحقيقه نماذج خلتني اقعد مع نفسي وافكر كدة هو لما الناس دي شايفاني بالوحشيه دي مع ضنايا لمجرد اني بحاول اربيه صح عالاقل مش بضرّة، اومال لو مش ابني هيتبص لي ازاي؟
ناس كتير ممكن تحاول تتدخل في طريقة تربيتك لطفلك فيزايدوا عليك أو ينقصوا ظنآ منهم انهم أحن عليه او أفهم بطريقة حياتكم وطبيعة تعاملكم منك انتي ك ام،والمُحزن ان عدد من الامهات بيضعفوا تحت تأثير الضغط الاجتماعي اللي بيحصل معاهم وبيبدأوا يتراخوا او يتعاملوا زي الاغلبيه، او حتى زي الناس اللي بينتقدوهم
فبيلاقوا نفسهم مش ضايفين بصمتهم التربويه في حياة اطفالهم بالعكس، دول بقوا فرد من القطيع السائد بدون تفكير حتى
أرجوكي يا كل ام..ماتسمحيش لنفسك انك تسمعي كلام من أي حد الا لو شاكة في طريقة تربيتك لطفلك وتتأكدي بنفسك من الصح
أرجوكي اوعي تضعفي وتقولي ما كل العيال كدة،او كل الامهات بتعمل كدة..
اياكي تسيبي نفسك وطفلك فريسه للضغط النفسي او الاجتماعي اللي بيحصل عليكم وخليكي عندك منهج ومرجعيه تستعيني بيها بعد الله علشان ماتشتتيش نفسك وتتعبيه
