شهادة الامام زين العابدين السجاد ع مامات مسموم .. مات من الهموم اگباله ذبحــوا والـده عطشان عــاري اي موته النوح .. عالمات مذبوح وعياله تركض خايفه بذيچ الصحاري ………………………………… اي ياخَلگ چبده صدگ بالسم تگطع اي ضل يلوج و ونته عرش الله يسمع اي ضل يلوج اعله الترب والروح تطلع لكن يلوج اعله الذي مالمه مصرع ألمنه بقه تشيل .. بالحافر الخيل لحمه وتطشه بكربله فوگ الترايب اي منها ياناس .. ضل يلطم الراس يذكر رمح نص چبد ابوه ياويلي صايب ………………………………… ابعينه شاهد كربله شعملت بالاحباب مذبوح ابوه امن الگفه ويرفس عالتراب وشچم سهم وشچم رمح چم حجر منصاب حجار ورمل شاف اعله ابوه ايسون احجاب شاف الولي طاح .. متشابچه ارماح جسمه ويسيل اعله الرمل ياويلي دمه اخته اجت ليه .. حتارت تلم بيه من كل كتر جابت عضو وگعدت تلمه ………………………………… شاف الشمر لمن اجه وثنـه اعله صدره يحسب الـه گـام اثنـعش طبره يطبره وبرجله من رد يضربه حيل اعله خصره وشافه يگـلبه وعالظهر رجله ، وينحره من شعره جراه .. وبسيفه كراه والدم ترس وجه الشمر لمن يحزه ومن لحيته شال .. ويراوي العياله راس الأبو يگطر دمه وبيده يهزه ………………………………… ابعينه شاف الخيل اجت صدره تسحگـه اتدوسه والحافر دمـه جسمه يغرگـه وزينب اجت تركض اله ورادت تشبگـه بس مالگت سالم عضو والها تطبگـه شالت دمه الراس .. وصاحت يعباس من راس اخيك ما بقه بس دم اليه من عنده ماضال .. لافيَّ ولا اخيال واشراح اگـلها عنه لونشدت رقيه ………………………………… شاف الشمر ألعَـمـته لمن اجاها ابسوطه يم حسين اجه الظالم ولاها يضربها تركض گامت ويركض ورها ويصيح هاي بت علي المحد حماها ومن تعـثر اطيح .. يايمه اتصيح غطيني يايمه بعباتچ يالزچيه خلصيني منه .. يطگني واظنه بذاك الحبل يربط اظن رايد اديه ………………………………… واشبيده ال بالطف عليل امگيدينه غير الدمع والحسره ياناس او ونينه هاي المصايب كلها من شافتها عينه بخيمه ويصيح احترگـة الخيمه علينه وابذاكه وضعـه .. ياهو اليطلعـه واولاد هاشم عالثره كلهم ضحايه وحتى النساوين .. حتارت تفر وين وكل وحده محتاره بسترها وبالعبايه الشاعر عقيل الحسناوي.. 1.1K views17:20
