#مشاعر_مؤقتة (الاصلية ) - #مابعد الفراق 2 - جمانة : مر اول يوم الفاتحة وعقيل مجاوبني ابد ولااتصل علية خفت كلش عليه گلت خل اخابر عماد اخوه بلكت يطمني عنة دگيت عليه وگعدت علچرپاية انتظرة يجاوبني دگ اكثر من مرة يلة جاوب عماد : الووو هلا خوية شلونچ جمانة : الحمد لله والبقية بحياتكم عماد : بحياتچ الباقية شلونة مسلم والوالدة ان شاء الله بخير جمانة : بخير الحمد لله واسفة لأن مأجيت عزيتكم بس ضروف حملي مانعتني عماد : معذورة ام مسلم مقدرين ضروفچ جمانة : بس خابرت اتطمن على عقيل مجاي يجاوب على اتصالاتي فدوة بس طمني عنة الله يخليك عماد : والله مااعرف شگلچ جمانة : فدوة احچي عقيل بي شي عماد : عقيل مصدوم وگبل شوية تخربط اخذتة للمستشفى گوة گعد بالفاتحة جمانة : شلون هسة عفية خل احاچيه عماد : ادللي هسة اخذلة التلفون جمانة : ضليت گاعدة واهز برجلي ودموعي تنزل وامسحهن ياربي كلة الة عقيل احفظة الية ماعندي غيرة بهاي الدنيا شوية وسمعت صوتة بعد اريد الزم روحي ماكو انفجرت بالبچي عقيل : شلونچ ابوية جمانة : الحمد لله انت شلونك حبيبي ليش مجاي تجاوب على اتصالاتي تدري شگد خفت عليك وهسة عماد گالي جاي تخربطت ليش مبلغتني بالجاي يصير وياك عقيل : وان عرفتي شتسويلي جمانة انتي حامل وحملچ صعب وماردتچ تعرفين كلهة شكم يوم واصيرن زين ليضل بالچ جمانة : صوتك بي نبرة غريبة ليش احسك مجاي تحچي الي بگلبك عقيل : شحچي يعني انة الدنيا ماتت بعيوني بموتتهة مجاي اگدر انسى شلون چانت تعاينلي مجاي اگدر انسى شلون قسيت عليهة بالحچي جاي احس بالندم انة السبب بموتتهة جمانة : لا عقيل لتحمل نفسك ذنب هذا يومهة واجلهة اجة كل واحد بينة الة يوم لو مهما تتعدد الاسباب الموت واحد عقيل : مراح تفهميني لو شكثر مااحچي مجاي اگدر اطلعهة من راسي ولچ ليسهة ممصدگ ماتت ضحكتهة بأذني ونگرتهة وياي كل حچيهة وشقاهة كبرت جدام عيني هاي ترباة ايدية اعزهة حتى اكثر من خلفتي الي من صلبي جمانة : اعرف حبيبي ومفتهمة شعورك بس لتضل تقهر بنفسك حور الله يرحمهة چانت تحبك اكيد مراح تفرح من تشوفك حزين استغفر عنهة اقرالهة قرآن الجاي تسوي بروحك مو حل ولتنسى انت عندك بنات يعتبرنك سند وابن الي هو مسلم وبنتك الي بالطريق شهگت وگلتلة واني عقيل منو الي مفكرت بية خليك قوي لخاطري صدگني اموت وراك اذا صارلك لاقدر الله شي عقيل : موش بيدي جمانة جاي اموت والله لو شكثر محچيتي هسة ميتغير شي چنت اعرفهة غالية علية بس من راحت عرفت قيمتهة الحقيقية بحياتي جمانة : عقيل حبيبي جاي تبچي عقيل : بچيت وشگيت ثوبي ولطمت على صدري وياريت لو البچي يرجعهة چان بچيت العمر كلة جمانة : صرت ابچي وياه وهو يبچي بتعب موتني اريد احضنة ياربي اكون يمة حاولت اقوي نفسي گلتلة باچر تدز احد يجي ياخذني اريد اوگف وياك بمحنتك عقيل : وين تجين خليني بمصيبتي ولتزوديهة علية مااريد اخسر بنتنة جمانة : شلون لعد مجاي اتحمل فكرة انك بعيد عني ومريض ومااگدر اكون وياك عقيل : لتخافين علية بس تخلص الفاتحة اجي لبغداد البيت هنانة جاي يخنگني جاي اشوفهة بكل مكان جمانة : تمام حبيبي منتظرتك اني بس فدوة جاوب على اتصالاتي لتخليني اضل افكر ومشغول بالي عليك تعرفني مااتحمل يصيرلك شي لخاطري عقيل تماسك عقيل : احاول وهسة تصبحين على خير مالي خلگ احچي والله جمانة : ماشي حبيبي روح ارتاح وانت من اهلة يعمري سدة واني گمت افتر بالغرفة روحي مفرفحة عليه ياربي باوعت لبطني ونزلت دموعي ياربي اني واطفالي ماالنة غيرة وين نروح اذا صارلة شي ياربي والله مااتحمل يروح مني يارب كرامة لوجهك اشفي وبرد گلبة الفقدان مو سهل ابد رحت توضيت ووگفت اصلي مااريد اصلي اني وگاعدة طولت بلسجود وضليت ادعي ودموعي تنزل اختنگت بالبچي ياربي فدوة عديهة لهاي الازمة على خير ورجعلي زوجي بالسلامة انت تعرف هو شنو بالنسبة الية هو زوجي وابوية واخوية وحبيبي يارب هو سندي من بعدك وملاذي بهاي الحياة انك على كل شئ قدير گعدت اقرى قرآن وهديت ثوابة لحور ضليت گاعدة للصبح مگدرت انام رغم العلاج يدوخني بس من القلق والتفكير منمت حسيت بوجع بضهري قوي خلى روحي تشوغ مددت بلگاع واني حايرة شسوي ياربي معقولة جاي اجهض لاياربي فدوة عقيل مو حمل صدمة ثانية احفظ هاي الطفلة ياالله ♡♡♡♡♡♡♡♡♡♡♡♡♡♡ عقيل : حاولت انام مگدرت وجع راسي 1.4K views19:41
