بأربعينيته .. أو نِتَاني الأربعين الجاي ــــــــــــــــــــــ | مهدي التقي

بأربعينيته .. أو نِتَاني الأربعين الجاي
ـــــــــــــــــــــــــ
ألَم .. بس بي دَفو .. وشگد حلو .. للمنذِبِح
ألَم .. بس بي عشگ .. للمنسحِگ .. والـ منطرِح
ألَم .. نشتاگ اله .. ونتحمله .. ونهوه الجرح
ألَم .. لإبن النبي .. يجمعنه بي .. زاد وملح

گال الرسول ..
حسين مني وهيج جسمه ينفرش !!
حسين مصباح الهدى إنقْشَت نَقِش
حسين اليحبّـه يِحِـب رب العـرش

باچيله .. من قبل لا ينولد
امشيله .. تضمن الجنه وترد
احچيله .. ينطي بيدك مستعد
ــــــــــــــــــــــــ
تَعَب .. بس التعب .. لجل الذهب .. يصبح سهِل
تَعَب .. بس بي ثمر .. ياحُب صَفَر .. لمن يهل
تَعَب .. يا لذّته .. ويا فرگِتَه .. الما تنحمِل
تَعَب .. بس بي دوه .. وشگد هوه .. إيلِمّ الشَمِل

صادِقَنه گال ..
ربي ارحم ذيچ الـ وجوه الصدگ
الـ بالشمس لجل الزياره تحترگ
والخــدود الـ عالگبر مـا تفترگ

مرحومه .. هالعيون اللي بِچَت
محفوظه .. ال علضريح إتگلُّبَت
معروفه .. هالجدام اللي مِشَت
ــــــــــــــــــــــــ
مشي ..منّ البحر .. حَدّ النحر .. بالقافله
مشي .. كل الأرض .. تمشي فرض .. إلكربله
مشي .. نگلت جِدَم .. ورفت علم .. نوصل إله
مشي .. إعلينه جب .. كل العتب .. نتحمله

والرِّضا . گـال ..
إلـ يِرِيد ايلاگي الله ابلا ذنِب
خل يزور المنحرم من العذِب
تعبه بس إسمه بسجلنه ينكتِب

والرايه .. خـل ترف بچتافه
هنياله .. الفطر إلنه اشفافه
مشّايه .. وهالـدرب مــا عافه
ــــــــــــــــــــــــ
خَطَر .. والمنتظر .. يرعاه حِضَر .. وي شيعِتَه
خَطَر .. بس المَنَه .. موت الهنه .. بزْيارِتَه
خَطَر .. بس يندفع .. كل الجمع .. بحمايته
خَطَر .. بس بي أمن .. كن مطمئن .. وبصايته

والمهدي گال ..
أندِبَك ياجدّي كل صبح ومسه
يحضر بيوم اربعينه وما نِسَه
ومستمِر حدّ القيامه بمجلِسَه

والقائم .. يفتر وبيده السجل
كل خادم .. بالرعايه ينشمِل
يالوادم .. إنتو شيّـالة حِمِـل
ــــــــــــــــــــــــ
سَهَر .. بي تنذِكِر .. أم الخدر .. لمن تِرِد
سَهَر .. لَمّ الحچي .. بيه البچي .. اعليه تنحسد
سَهَر .. بيه الهَنَه .. يعود بسَنَه .. وليه نستعد
سَهَر .. بي نستلذ .. بيك خير إخذ .. تنال المجد

زينب تگول ..
ايضَل ذِكرنه وللأبـد ماينمحـي
إحنه آيه وما يموت إلنه الوَحي
شما نقدملـچ يزينـب نسـتحي

و أرواحنه .. كون تطلع للضعـن
بجراحنه .. كون ندخل للصحن
بحساسنه .. كون نبني لچ وطن
ــــــــــــــــــــــــ


مهدي التقي