يا جرح الزمـان .. يا مصـدر أمــان يا أجمل سليب .. يا معنـى الح | مهدي التقي

يا جرح الزمـان .. يا مصـدر أمــان
يا أجمل سليب .. يا معنـى الحنان

ــــــــــــــــــــــ
لحظة الـذبـِح .. منها والصبح
سَلّمَك زِمـَـامَه
الدم نزل نده .. منها و إبتده
مِشعَل الكرامه

حَتّه كتّالَك تِعَجَّب .. ساعه صافن بيك
ورَمْلَت الطف قَبِّلَتَك .. واستحت تچويك

من ضاگت دِماك .. ضاعت وي سِمَاك
لليوم الرمــال .. تقــره بمُحتـواك
ــــــــــــــــــــــ
وانته تنسِحِگ .. ينولد عشگ
يدخل الضماير
وانته تحتِضِر .. ينزف العطِر
يإسر المشاعر

عطرك الـ شَمّتّه زينب .. والگلب محروگ
والسَنَه العاشَتها بعدك .. بيها ماتت شوگ

وميمونك عجيب .. والأمر الغريب
من شافك ذبيح .. مات من النحيب
ــــــــــــــــــــــ
جسمك الوِصَلْ .. والصبح ذِبَل
يعلن المناحه
رمحك ارتفَع .. والزمن سِمَع
مُستَهَل جِراحه

والدهر ضل مستعِدلَك .. والشعور يهيج
إنته رِكضتلَك ملائك ..ركضَة اطويريج

والكون ابعزاء .. يبچي الـ كربلاء
دُوْرَت حاجِبيْك .. محنيّه السماء
ــــــــــــــــــــــ
امجنِنْ البَشَر .. تمشي من بَحَر
والنَحَر تِجِيله
عدها مُعتقَـد .. ما غيرك ابد
يا أحَبْ وسيله

مانِلُوم الوادم إنطَتْ .. عالضريـح إيدين
من سفينة نوح أكبر .. خنصرك يحسين

يا أجمل صريع .. والنحر الگطيع
يابحر الدموع .. والمَركب وسـيع
ــــــــــــــــــــــ
وانته تِنْظِلُم .. ينولد لَطُم
عمره للقيامه
وانته تنسلِب .. ينولد مُحِب
يعشَگ الخدامه

احنه ماشاهَدنه طُولَك .. كل دقيقه انموت
ومن يِحِل يوم أربعينك .. تِنهِجِـر لبْيُوت

يبو گلب الحنين .. خيمة زائرين
وسِر هاي الحياة .. إمحرّم وأربعين
ــــــــــــــــــــــ

مهدي التقي