نعشچ إنشال .. إبلايه كفّال مَوَّتـِچ طـف كربلـه وانتي چنتي إ | مهدي التقي
نعشچ إنشال .. إبلايه كفّال
مَوَّتـِچ طـف كربلـه
وانتي چنتي إمدللـه
ــــــــــــــــــــــ
سـبب موتـچ چـان من ذيچ المصيبه
إبلد غُـربه انشـال نعشـچ يالغـريبه
انتي حصتچ بتلصبر كلش عجـيبه
النهر مآخذ گمـر . منچ من يجيبه ؟
چان موتچ ذبح أخو .. وانتي وحدچ وي عدو
وبيدچ احبال
الخيل إجتلچ راكضه .. هناك نص عمرچ گضه
والحچي أشكال
ابذبح الحسين .. متّي مرتين
شيبقى بالـ يفگد هَلَه
وانتي چنتي إمدللـه
ــــــــــــــــــــــ
خلص عمـرچ بس معانات و أذيّـه
ابعدد اصحاب الكِسَا شفتي المنيه
من السقيفه الحد خيول الأعوجيه
صبح ماكو ويبدي يـومچ مغربيـه
من الزغر هذا الوضع .. يبدي يومچ بالدمع
وينتهي ادموع
اتعوديتي اعله الخنگ .. من الزغر باب وحرگ
وطگّت إضلوع
جروحچ إكبار .. والوكت جــار
سهام دهرچ حرمله
وانتي چنتي إمدللـه
ــــــــــــــــــــــ
ويّه هاجر لو نقيسه جرحچ أعظم
إنتي يم جرح الچبـير الماله مرهم
كلشي ينظم إلا دمعچ صعبه ينظم
خمـس مــرّات بحياتـچ مَرْ محرّم
انتي ليلچ من يجن .. يبتدي ويگضي بحزن
وكله لچمـات
حسين راح وما رجع .. حيلچ ودمعچ وگع
والگلب مــات
حزنچ إيزود .. وطاحن إزنود
وصرتي إنتي الكافله
وانتي چنتي إمدللـه
ــــــــــــــــــــــ
ميته عدله ولا نشف يالحره دمعچ
ماكو إبنچ لابو فاضل مِن يشـيّـعچ ؟
الشام نفس الشام بعده ونفسه وضعچ
بالكــلام المالــه داعـي رَد يّسَــمعِچ
شتموا إگبالچ علي .. وهسه كتبوا إرحلي
الـ مالهُم دِين
وانتو اهل هاي الأرض .. وعالخلگ حبكم فرض
وانتي تدرين
حقد الأجناب .. القالع الباب
و والـدچ عقـد الولـه
وانتي چنتي إمدللـه
ــــــــــــــــــــــ
يا أميره والأميــره اتضــل أمــيره
انتي يا بضعة علي وذيچ الچبيره
الاسيره الشام موش انتي الاسيره
انتي حته الحيره منچ عدها حيره
الصبر ماضل بي صبر .. شاف كعبه ابنص جمُر
تسـحگ إبـنار
شاف چم طفله وطفل .. وشاف خيمه وكلها ضِل
ابفيها لـزْغار
شفتي لوعات .. اشبعتي موتات
هـاذي كُــل المسـأله
وانتي چنتي إمدللـه
ــــــــــــــــــــــ
مهدي التقي
