أهل البقيع وكربله .. وسـامـره والنجـف والكاظميين إعتنَوا .. مش | مهدي التقي

أهل البقيع وكربله .. وسـامـره والنجـف
والكاظميين إعتنَوا .. مشْهَد إجه و نِزَف
كلهم أجوا *** إلزينب بچوا
هالليله بالشام
ـــــــــــــــــــــــ
سَـ يُقام المآتم الليله اعله زينب كتبَوا
آل طالب هالسنه بصحنچ عزائچ نصبَوا
من مشاهدهم تعنّوا ولحضرتچ وصلوا
وأبو الأكبر يعتلي المنبر وأيمّه الحضروا

صاعد حُسَيْن ابمنبره والمجلس إنعِقَد
چي راسه چان امرفقگـچ يا آيـة المَدَد
و إتْجَمِّعَوا *** إلزينب بچوا
هالليله بالشام
ـــــــــــــــــــــــ
إنذَبَت اعليچ العمايـم وإنقرالـچ مقتل
تعزيه وكلهم إيمّه وعلي ابسَطْر الأوّل
مجلس ويقراه إخييچ مثله ابد ما يحصل
بعده عطشان وقرالچ گال كلشي أتحـمّل

بصوته الحلو وكلش عذب وبنبرة العطش
بسم الله گلهم و أبتدي من ليلة إهدعش
إهنا دمِّعَوا *** إلزينب بچوا
هالليله بالشام
ـــــــــــــــــــــــ
گالهُـم مــن كربله للكــوفه چِنْـت ارفِگها
وين ما راســي ايتحوّل عينــي بس تلحگها
بالإســم اعرفها كلهـا الـ بسـياط إطگـهـا
بس هضيمه إيدين ماكو من الرمح وأشبگها

سمعوا ملائكْةْ السمه بالعتره تِنتحِب
يا ربنه تإذن نِنـزِل و بالخدمه ننكتب
و إستأذِنَوا *** إلزينب بچوا
هالليله بالشام
ـــــــــــــــــــــــ
هاذي موش إمن الخيال و أستِدُرّ العَبَـره
الحضروا بليل اهدعش مو صعبه جَيْت الحضره
ميته شافوها وغريبه أو جُوها كِلّ إلعتره
المجلس ابصحن العقيله وبابه حِصْتْ الزهره

ماشَتْ ضعنهم بالسبي وشافت شنو الجَـرَه
بس صوت الحسين إيفَرِق عن اخته لو قره
إنوب أوگِفَوا *** إلزينب بچوا
هالليله بالشام
ـــــــــــــــــــــــ
وصِعَـد عباس ويگلهـم يرحـم الله الواگِـف
هذا مجلسنه اعله زينب والتعـب ميخـالف
آنه هم ماشي ويه أخييتي إتكفّلتها وحالف
الـ هالبَلَد لمّن وصلنه إحجار عنها إنشاگِف

بس مشكلتنه اعله الرمح صح بالنظر نِهِد
آنـه وأخيّـي بهـالوكـت لو عدنـه بس زَنِد
چا ما حِچوا *** إلزينب بچوا
هالليله بالشام
ـــــــــــــــــــــــ

مهدي التقي