لازم إيسَــمّوك هــارون الغشــيم
يا غشــيم النــور أبد مـا ينحبس
إنته مثــل الشمر هم عقلك زغير
رايــد ابغربيلك إتغطّــي الشـمس
الله نـور النور حــط بالعصمه نور
چا خــذت من كربـلا عِبْره ودرس
حسين من سوّو وِصَل ضَيعته خيل ؟
حته هسَه الكاظم ايضيعه الحَبِس !
ســرعة الضـوء العِلِـم حَلَّلها هيچ
أســرع من الخـيل و إسجونك أمِس
وشـغلة الســجاد والگـيْد الـ بِدِيه
بالصحـيفه آثــارها وما تنطمِس
ورَكضـة الباقر ابعمر اتْلَثْ سِنِين
لا چِوَت عِلمَه ولا ضَيعَتْ له حِس
و جامعـة جعفر نموذجــها هشام
طُهُر والمنصـور ذاك إيضَـل رجِس
الرشــيد الچــان عايش بالسجون
وبالقصــور المـات هارون النجِـس
هسـه ياهو العايش إبعيشة ملوك ؟
و ياهو من سمّ الرُطَب أكثر يِحِس ؟
هسه ياهو العالجسر ياهو الغريب ؟
ومنهو صاير مَهبط الـ روح القـدِس
( أينمـا تُمْطِر ) .. بعد للكاظِمَيْن
وموش ماي الصحـن وادم ينتـرِس
من عتِبْتَه الذهب صــاعد للقِبَاب
وصار ذاك القصــر ما يسوه الفلِس
#بسم_الله_الذي_خلق_النور_من_النور
