يا موسى .. عالجسر كلّ العراق إيتاني ـــــــــــــــــــ بعد | مهدي التقي

يا موسى .. عالجسر كلّ العراق إيتاني
ـــــــــــــــــــ
بعد بيدك ماكو گيْد .. و ألف مثل إبْنَ سُوَيْد
والجسور إهوايه
مملكه اتعزّب ضيوف.. دوله من خمسَةْ حُروف
دولة الـ ( مشايه )
عرش ممكلة السجين .. و إدخلوها آمنين
أيُّهَا الوفـايـه

بغدادك .. والمواكـب هسّه عـالم ثـاني
يا موسى .. عالجسر كل العراق إيتاني
ـــــــــــــــــــ
مو حماميل الجسر .. شعب كامل ينتظر
يا أسد بغدادنه
ومو لهـارون المكـان .. انته سـلطان الزمان
وانته باب امرادنه
هسّه يا جَدّ الجواد .. انته صاحب هالبلاد
وانته أصل أمجادنه

يا هيبه .. راح سجنك . والله قصرك باني
يا موسى .. عالجسر كل العراق إيتاني
ـــــــــــــــــــ
الأرض هسه كلها لِيْك .. ذِلْ ابن شاهِك بديك
ديرِتَك معموره
عرش ننصبلك چبير .. يا أمير وتبقى امير
ونِهدِم الطاموره
توگف بهيئة ملوك .. عالجسـر يسـتقبلوك
شيعتك مسروره

محفوظه .. كاظميتك واللعين إلـ فانـي
يا موسى .. عالجسر كل العراق إيتاني
ـــــــــــــــــــ
هاا يبو الگلب الوسيع .. ماكو فضل ابن الربيع
هسّه هاي أيامك
ماكو هارون النفاق .. انته عاصمْةْ العراق
وشيعتك خدامك
كاظميتك بس ورود .. ابراحه طوّول بالسجود
وانسى ذيچ آلامك

وبلادنه .. چنـها جنّه إبنـورك الربّـاني
يا موسى .. عالجسر كل العراق إيتاني
ـــــــــــــــــــ
عالَمَك يرجع جديد .. لا سلاسل لا حديد
موسويّه الديره
بالملايين الـ يّجُون .. ماكو شرطه ولا سجون
بس مواكب غيره
إنسى كل ذاك الظلام .. انته تحكم والسلام
يابو سفره إچبيره

إتنادينه .. هلا بكل زاير گصدني وجاني
يا موسى .. عالجسر كل العراق إيتاني
ـــــــــــــــــــ
بعد ما ننخى ونِجِيب .. هسه بس انته الطبيب
يابو گلب الصابر
هسه صار العنده داء .. ابابك ايحصّل شفاء
يالتطيْب الخاطر
انته نور وتبقى نور .. راحت اصحاب القصور
وانته تنهي وتامر

مولانـه .. وخادمـك چم رافضي ونصراني
يا موسى .. عالجسر كل العراق إيتاني
ـــــــــــــــــــ

مهدي التقي