چِنْت الليل إتسِد إعيونه وما شايف ضِـلّي اليرجف منك طلعت عينه | مهدي التقي

چِنْت الليل إتسِد إعيونه وما شايف ضِـلّي
اليرجف منك طلعت عينه ومسبيّه إيگلّي
بيدي حبال .. و الـ كتّـال.. مسبيّه إيگلّي
ـــــــــــــــــــــ
زينب مو گبل خويه تعال وعاين ام عون
الما شافتها گمـريه عليها انفتحت اعيون
اخييّتك موش الأوْليه يعباس اشتگولون
حته الكوفه مو هيّه عليّ فزعوا يسبّـون

هاي الوادم مادري شبيه .. مابيهم نخوّه
مالتنه الكوفه انطب ليها..لا حول وقوّه
مــا تنگال .. بيدي حبال .. ومسبيه إيگلّي
ـــــــــــــــــــــ
وكت روس الزلم صارت بيد الـ ماهم أزلام
والله ودارت الدنيـا وهاي الدنيـا أيام
ابو الماضي القذر بيها أمير ابدال أبو إلثام
دخلنه إمچتفه ايدينه إعله وادم عدنه خِدّام

عباس افزع شوف اشصاير ..خويه إتأذّينه
ايدينه انجرحت ميخالف .. بس إنسبّينه !!
سْمَعْنه أشكال ..بيدي حبال.. ومسبيه إيگلّي
ـــــــــــــــــــــ
تعال اتمرجل اعلينه الچان من اسمك يخاف
علي ابصفّي انچتف وسفه ورگبنه إمچتّفه إچتاف
وطولي المحّد يشوفه دخلت الكوفـه ونشاف
خذونه الديره متْشَمْته ماضن ناسها أشـراف

كلساع وسهم ايطگوني .. ما چنها احچايه
ها زينب چاوين اخوانچ .. شو ماكو الرايه
شلون أنذال .. بيدي حبال .. ومسبيه إيگلّي
ـــــــــــــــــــــ
يعباس الحدوا بينه .. ناس الماهم أخيار
مدري منين يا مِلّه ..قليله بحقها كفّار
وصْلَت بيهم الحاله .. يعوفونه إحنه الكبار
ماعدهم رحم عدهم .. سُوله إبطگ الزغار

شتحچي ويه الماعدهم ذمّه ..هالشغله إتحيّر
كل واحد يا خويه اشكبره .. ويطگ له إزغيّر
بچّه أطفال .. بيدي حبال .. ومسبيه إيگلّي
ـــــــــــــــــــــ
بعيد الشام ياخويه وصلنه ابطلع الارواح
اجينه ابهيبه وياكم رجعتوا ويانه برماح
تعال احسب گلب زينب شكثر بي راجع اجراح
هوه آنه ادري بي گلبي ما يوم أذكر إرتاح

إحسَبْت احساب لكلشي وهاي .. ما جتّ إبالي
يا عباس ارجع مهضومه .. إبلا خدر أو والي
بس لعيال .. بيدي حبال ..ومسبيه إيگلّي
ـــــــــــــــــــــ
والمر بينه بالكوفه ضعف بالشام شفناه
وديوان الرجس وسفه يبو فاضل دخلناه
سكينه تصيح ياعمي واصيحن وا حسيناه
كل هذا وگلت سهله النذل ما قصّر وياه

سكَّتِتْ الديوان وعينك .. وانه اختك زينب
من طحتوا لحد ما هدّونه ماشافوني أنحـب
صبري جبال ..بيدي حبال .. ومسبيه إيگلّي
ـــــــــــــــــــــ

مهدي التقي