والله حيره .. ويگضي دربك ويّه شمّات والله حيره والله حيره .. | مهدي التقي

والله حيره .. ويگضي دربك ويّه شمّات
والله حيره
والله حيره .. الراح أخيها تموت لچمّات
والله حيره
ــــــــــــــــــــ
الأخت لو صاحت لاخوها يگلها صار
وآنه اصيحن على إخواني وكِلّي نار
خاف أكض ايتام اخوي وچفي حار
حســين گـوم وياي شِيْلِم الزغـار

والله حيره .. بيش ألمها و كِلّي چويات
والله حيره
ــــــــــــــــــــ
العدها مثل إخواني يخسه يمرها ليل
طاحو وجتني العسـاكر چنهـا سـيل
گمت اصيح (حسين) بس مابيّه حيل
حسين خيل التاخِذَه وتجيبه خيل

والله حيره .. و زين ضلت بيّه نبضات
والله حيره
ــــــــــــــــــــ
رحت فدوه لبو الرايه الـ كلّه جـاه
الـ أخذ جوده وأخذ عمري ومانساه
المات أخيها وچـان أملهـا إبفيّ لواه
شيبقى بيها تموت أحسن شي وراه

والله حيره .. وراح وين العنده وگفات
والله حيره
ــــــــــــــــــــ
احچي وي روحي وأگلها هم يجوچ ؟
وشامت إيجاوبني زينب مات أخوچ
الشام خوش احجار بيها إيناطروچ
إواحـد بديوان صــاح إيدخــلوچ

والله حيره .. إنترست إذني بهالعبارات
والله حيره
ــــــــــــــــــــ
واليسـافر بالســلامه إنگله كون
مو بسوط وحيل ينزل بالمِتُـون
أبچي و أتمنّى ابدربنه إيطوّلون
وياي شمّات وشـماته إيناطـرون

والله حيره .. طويل دربي ونوگ عرجات
والله حيره
ــــــــــــــــــــ
محّد إيحس بالمراره البيها أنام
مثل گلب حسين بيّه شگد سهام
رجعت لا خوّان عندي ولا خيام
آنه يوم إهدعش ميته و السلام

والله حيره .. الروح بيّه وشفته من مات
والله حيره
ــــــــــــــــــــ

مهدي التقي