چا .فوگ الجَرِح .. والدم والذَبِح مرافَگني برمِح .. خويه خَلْ | مهدي التقي

چا .فوگ الجَرِح .. والدم والذَبِح
مرافَگني برمِح .. خويه
خَلْ نحچي آلام .. منّااا للشـام .. خويه
ــــــــــــــــــــــ
من ظهر الناگه .. وشلون إمـلاگه
لوجهك مشتاگه .. بس امتعبينك
يالـ مِنهَد حيله .. ومشتاگه أحچيله
سفرتنه اطويله ..وانته الله يعينك
يالـ عايش بيّه .. إتحمّلني شويّه
سوالف مسبيه .. وإقراها بعينك

شمسوي الحجر .. بجبينك حُفَر
خَلْ نحچي القَهَر .. خويه
دامك گِدّام .. منّااا للشام .. خويه
ــــــــــــــــــــــ
غير انته الغالي .. نسولف عن حالي
بس شوف احبالي .. تعرف موضوعي
يابعد إعيوني .. وياگ إيمشّوني
يآذنّي امتوني .. ومرضوضه اضلوعي
ضربونه وصِحنَه .. من النوگ وطحنه
وبرمحك لِذنَه .. أو وشّلت إدموعي

رمحك دار . إلي .. هااا يابو علي
شو . مو الأوِّلي .. خويه
بس رافع هام .. منّااا للشام .. خويه
ــــــــــــــــــــــ
خويه اشما اعثر .. صاحولي العسكر
حِلْ . يابت حيدر .. شتموني وعُبْرَت
يبو راس الدامي .. الذبحوه گدّامي
وحرگولي خيامي ..وأيتامي إطشرت
ما شفنه الخيمه .. خيمتنه الهيمه
إيتيمه اعله ايتيمه .. بالطف انشمرَت

يا بعد الگلُب .. إختك وي غُرُب
صارت تنضرُب .. خويه
بس ما تنلام .. منّااا للشام .. خويه
ــــــــــــــــــــــ
جاي أفهـم ردّك .. لا تحچي العندك
ويسولف خدّك .. بي حافر طابع
يا ريحة جَدنه .. إشما يمّك أدنَه
شفافك مو هِنّه .. ومن دمك شابع
يا هيبة غالب .. شو لونك شاحب
چان وين الحاجب .. الـ عله رمشك راكع

يابعد الأهل .. شو خدّك ذِبَل
برمحك بس جبل .. خويه
وممشانه أيام .. منّااا للشام .. خويه
ــــــــــــــــــــــ
من يوم العاشر .. وللشام انسافر
وهم نرجع باچر .. وراسك بيديّه
ويحسين اعذرني .. خاف اتشاهدني
من يرجع ضعني .. ناقص علويّه
لَتفكّر بيهــا .. ولتخــاف اعليـها
ارتاحت تدريها .. من ضيم الدينه

كاتلها التَعَب .. سِلبوها الذَهَب
ولهذا السَبَب .. خويه
خلّيها إتنام .. منّااا للشام .. خويه
ــــــــــــــــــــــ

مهدي التقي