قدْ حانَ مَمْشه الكُرَه الأرضيّه و الـمُلتقــى بالأربعيــنيّــ | مهدي التقي

قدْ حانَ مَمْشه الكُرَه الأرضيّه
و الـمُلتقــى بالأربعيــنيّــه
ـــــــــــــــــــ
هيچ كل العالم أصـبح چنّـه ديـره إزغـيره
موش بيده ابخنصر ايده حسين والله يديره
حسين كلما ترجع اخته إيسوّي خيمه إچبيره
من البحر حَد باب صحنه إيحط مواكـب غِيره

البيت الچبير وناسـنَه إشويّه
و الـمُلتقــى بالأربعيــنيّـه
ـــــــــــــــــــ
ثابته ولا ماكو حاجــه تسـأل الله العوده
حسين ما عايزله ناصر دوم يحچي إبزوده
النيّــه من واحد محــرّم للخَـدَم معگوده
من الحدود إلحَد ضريحه سُفرتَه ممدوده

هاي الزياره إتحسّها ثوريّــه
و الـمُلتقـى بالأربعيــنيّـه
ـــــــــــــــــــ
حسين حد هاليوم باقي ومستمره انصاره
حسيـن كل الأرض داره ويبقـى عامر داره
ألف مرّه نِحـمد الله عـدنه هيـچ إزياره
الله من ســابع ســمائه إيخطّط إلزوّاره

هاي انتفاضه من الله محميّه
و الـمُلتقــى بالأربعيــنيّـه
ـــــــــــــــــــ
حسين ربّه انطاه كلشي ووحده منهن هـايه
زرع كــل الأرض شـيعه وخَضّــرَت مشــايه
من رِجَع راسه ويه أخيْته انطاها هيچ حچايه
گلها باچر خويـه عدنه خيام خِدمه اهوايه

وإنتي الأميره وماكو مسبيّه
و الـمُلتقــى بالأربعيـنيّـه
ـــــــــــــــــــ
رايه مصفوفه اعله رايه وچادر الصف چادَر
والهلا إحچايه وتحسـها من الخَدَم تتشامَر
الخادم أتحس ابخدمته ويه التَعَب يتاسمَر
أربعــين حسـين واحـد ماكو مثله ولا مَر

مخلوقه بالجِينَه الوراثيّـه
و الـمُلتقـى بالأربعيــنيّـه
ـــــــــــــــــــ
الغايه من هاي الشعيره الـبالدم إحفظناها
زينـــب اتـــرد ابضعنها وكــون نتـلگّاها
زينب إبذيچ المسيره حسـين والله وياها
ابلايه عون اترد لأخيها اتريد عون وياها

وانتم كفـو وأهـل العزوبيّـه
و الـمُلتقــى بالأربعيــنيّـه
ـــــــــــــــــــ

مهدي التقي