انا ماعندي ام انا فردوس امي من يوم يومها ،، اجه بشار ناحيتي جر | #روايات و#قصص #عراقيه #واقعيه
انا ماعندي ام انا فردوس امي من يوم يومها ،، اجه بشار ناحيتي جر راسي وباسه بشار: هذا هو يا گلبي لا تنقهرين ،، سرى: بلعت الغصة بالكوة ،وهم سدو الموضوع صارت ب١٢ الضهر طلعوني للبيت وبقو بيت عمي يمنا وخابر جواد كال طلعنا هذال ورادين للبيت هسه ،، لل٢ ونص خابرت عمة اخلاص على عمتي فردوس وهي تحجي وياها لطمت على صدرها وصاحت يمه بنيتي عرفت جيلان بيها شي بقت روحي تلوب لحد ما سدته وكالت هيج وهيج صاير وجيلان طارحه ، سودة عليه والله روحي لابت عليها هسه شصاير بحالها وحال اخوي البعده مالحك يتهنى بفرحة عمره ما صارلهم بس شهرين متزوجين و وكعت على راسهم هالمصايب ،لو بكل جره نفس احسب الله عليج يا فلك همات ما يبرد گلبي ،، بسرعة راحو بيت عمي من سمعو بجيلان ،وبقينا احنا لو ما وضعي جان حطيت روحي وياهم بس ارد اتطمن عليها ،، . . . فردوس: بقيت يمها ونزلن البنات يصبن الغده لن صارت ساعة ٣ وبعد لحد الان من الهبطات محد حط لكمة بحلكة نزلت انا عصرتلها برتقال وصبيتلها مي لحم وصعدتلها اتوسلت بيها شويه اكليلج لكمة وهي ما تقبل وبس ساكته وصافنه وراسها على مخدتها ،بالكوة وبالتواسيل ياله شربت بس الشربت ورجعت نامت غطيتها وطلعت خليها ترتاح ، ونزلت جوة لكيت البنات محضرات السفرة وعباس جان راجع من يم بيت عمي وجاي يحجي ويا جواد الي عرفته هو رايح وحاجي كلشي صار وسالفه اخو السحارة كدام عمي ومحمد وعايفهم وراد ، اتغدينا وكملنا هذال جان نايم وانا اعرفه من ينقهر لكمة ما تفوت بحلكة ، جاي نشرب الجاي ماحسينا الامرت محمد فاتت بنص البيت وتصيح الحكووونا الحكونااا كمنا نتراكض عليها جانت بالحولي واكفه واحنا طلعنا من الصالة والمطبخ نتراكض ،وهذال نزل من فوك مخروع وهي تصيح عمي اتخربط الحكووو فدوووه محمد وحده حاير بي ، هي كالت هيج طلعو عباس وجواد يركضون لبيت عمي وهي وراهم اباوع لهذال قطرة دم ما باقية بوجهه وكعد بمكانه عالدرج وخله ايده على راسه بتعب ، صعدت يمه ادري بي اكثر واحد بينا انهبط وهو اصلاً نايم بواهس وباله يم جيلان ، 1 جريت ايده من راسه وكلت كوم عيني كوم رد للغرفه ارتاح ،،، هذال: يا راحة يا غرفة من اشتععععل حتى جدي ،،ادري شنو من عايلة هاي ما يجي منهم بس شلاع الگلب ، 10 فردوس: شنسوي حظنا بعد رفع راسه وسالني بقلق هذال: شلون صارت ؟! فردوس: لا تخاف هسه تصير زينه والله ،نايمه هسه شربتها شربت برتقال لن ما قبلت تاكل واخذت دواها ونامت هزلي براسه وكام وكف ورجع صعد وانا عفته ورديت يم امي للصالة بيت برهان همات اجوي ورادو يصعدون لجيلان وكلتلهم نايمه هسه وطمنتهم عليها ،، وخابرت مروان والجهال هم سالت عنهم لان من الصبح من جابني وهم ما يدرون هسه من كعدو وشافوني ماكو انقهرو ، مرت ساعة ونص وخابر جواد كال جدي مات ، الله لا ينطيج فلك حتى ابوج مات من قهرج ،انقهرنا على عمي ما مأذينا بشي خطية الله يرحمة ويغفرلة هو بحياته انشلع گلبه من وره خلفته فلك وعدنان ،وهسه راح وهم بقو يتلفحون فلك مشموره ببيت اهلها وعدنان مسافر وعايفهم حتى سؤال ما يسأل على امه وابوه،، صارت الفاتحة مال زلم و خواني و ولدهم ما عافو محمد لان خطية بس هو وابنه بالفاتحة وهو خوش ادمي وما شفنه منه الاذية بيوم ، 70 واحنا البنات ما رحنا للفاتحه ابد من ورى فلك كلنا من تخلص الفاتحة نروح لنجمة بت عمي للبيت وناخذ من خاطرها ، . . هذال: جنا كاعدين بالجادر الصارله ٣ ايام منصوب بالشارع واليوم الثالث خلص وخلصت هوسه العشى وانا صارلي هالتلث ايام على عمى عيني كاعد وانا ماريد اي شي من طارفها راحت العالم وطلعنا نتمشى انا وخالي محمد ،جان بحلكي حجي بس ماعرف شلون ابدي بيه وماريد ااذي بكلامي بس هو حجى ،، محمد: ابوي مات مجلوط من وراها ومن ورى همها وفضيحتها الجابتها النا ،،وانا لو ما امي واكفه بعيني چا من زمان شمرتها بالشارع وما يشرفني هيج اخت لاعبه بالدنيا لعب هذال: ضحكت نص ضحكة بوجع ورديتله ، هاي انت الما ضكت منها العذاب وهيج جاي تحجي ، انا شحجي وشكووول؟؟!! انا الدمرت حياتي وحياة اغلى ناسي من عمي ومرته لجدي وعمتي لحد ما وصلت اليه انا ومرتي !! وانا اكولها الك بدون زعل خالي انت وغالي علي وما شفت منك اذية بس انا ما اريدكم هنا بعد ،ولا اريدها تضل قريبه علينا انا تعبت وانتو همات تعبتو واذا ضلت هنا معناها رح تبقى تحفر وتهجم بيتنا لان اختك حية وما تعرف تركد بمكانها ، 4 محمد:بدون ما تحجي يابه انا اصلاً بكل الحالات رايد ابيع البيت والمعمل وانطي حصه نجمة وعدنان وامك تبقى حصتها وياي واخذلنا بيت اصغر قريب من شغلي ،ومثل ما كلت انت انا ماريد المشاكل وسوالف النسوان تهد بيني وبين ولد عمي شو انا حتى اخو مثل البشر ماعندي
