2022-08-03 20:55:17
ليش يمة ليش .. تكابرين وتدعين برود المشاعر واني اشوفج مذبوحة وتحبين سرمد ليش
.. امي اني تعباااانة حيل ماكدر انام .. وجوه هذولة الي نذبحو ونغدروو ميروحون من بالي ويجوني بالمنام وكوابيس هواي .. عرفتي ليش هيج
طول ما اني كاعدة وحدي واني افكر واتعب والوم روحي الف مرة واتگطع الف گطعة .. حتى نضال اذيتها بسببي وصلت هل المواصيل بسببي
كافي بنيتي كافي . رحمي روحج رحمي حالج
صارت بيج .. عقد نفسية .. كافي ..
انتي بس استغفري الله هوة راح يقبل توبتج وراح تخلصين من الي انتي بي
ترة الي تسوي مراح يغير من الموضوع شي .. مراح يرجع الزمن ليورة ..
كومي غسلي وتوضي راح ترتاحين
هههه وداد انتي هج تحجين .. سبحانك ربي تغير ولاتتغير
حبيبتي .. الهداية من الله .. يلة لج كومي لتضيعين الحجي بلة كومي .. وكيحة متكعدين راحة هههه
بلفعل
سمعت كلمتها .. وكمت توضيت وياها
وامشي وياها . حسيت روحي طفل من امة تاخذة تغسلة وتبدلة ملابسة وتعلمة شلون يصلي . احساس حلو واني كأنو نولدت من جديد
جابتلي ملابس الصلاة. . اول مرة اصلي . من سنين طويلة من ايام ابوية وذاك البيت الي بي ريحة الجنة ريحة الطيب
صليت وكملت
احسن نولدت من جديد . اول مكملت داگوم .. احس نسمت هوة باردة وحلووة تغلغلت بئنفاسي .عيشتني غير احساس .. هواها من الجنة بيها ريحة طيب مثل قبل بذاك بيتنة جنت
بنية بسيطة احلامها بسيطة
اليوم بس حسيت هذا الاحساس
جنت اعرف سبب اذيتي هوة المكان القذر الي اروحلة
نمت بسرعة ولاحسيت بشي ولادمعت عيوني .حسيت راحة مابعدها راحة ......
كعدت ع ريحة طيبة .. اول مرة احس انو اني بهل الراحة
كلامها اثر بية .. جنت محتاجتها . بس اكابر . لان اشوفها هية سبب دماري
بين النايمة وبين الكاعدة . اشتم .. ريحة جاي مهيل .. وياها رحيت المخلمة والخبز الحاار
وداد ع طول طبخها طيب .. بس مجنت احس بطعمة ولا لريحتة . بس اليوم .. شميت هل الريحة وحسيت بأجواء عائلة ..
يمكن ياسين . من دخل حياتنة غيرها رئسا ع عقب الله يمكن دزة النة .. هوة جان فرحتنة .. وطول الوقت خايفة ليجي احد من اهلة وياخذة .. لذالك قررت ابتعد
ورة دقايق . اسمع ياسين وامي .. تعال ولك وين رايح .. ..خالة شبيج غير داكعد نغومة ..
ولك عوفها نامت متأخر .. تعال كعد صبيت لك الحليب .. وهوة يجاوبها والله والله ماكل اذى متجي هية ويانة ..
وانفتحت الباب بسرعة ..
اقترب الفراش .. باوع ماكو اني
بقة يدور .
اجيتة من ورة وجان افززة .. هووووووو
اباوع علية كام يعيط ويكمز .. وهجم علية يضرب بية .. واني اضربة ونضحك . امي من بعيد واكفة تضحك ..
ياسين شكلة حلوو يشبه غادة نفس العيون والشعر السرح .. موكلش طويل مدحدح ومليان بشرتة بيضة يخبل
حبيتة وحسيتة ابني .. وكلت خلص هوة الي راح يعوضني عن كل يوم اسود بحياتي
مرن اليومين ..
مخليت بالي يم شي .. واكتفيت بوجود امي وياسين ..
لمينة ملابس الي نحتاجهم بس
والباقي اتخلصت منهم وتصدقت بيهن ..
سلمت البيت لهلة ..
وبوجهنا للمطار .. مخبرت اي احد عن موعد الطيارة
طرنة لسوريا ..
ودعت ارض العراق .. وجانت دموعي مالية عيوني
واحساس صعب .. اصعب شعور هوة الفراق ..
بقيت . ست اشهر بسورية ..
الى ان الجماعة اصدقائنة سحبونة .. وتنكرنة بالشكل وطلعنة بجوازات مزورة. .
والحمدلله كلشي تم بنتهى السرية والامان
استقرينة بوالية دورهام
جانت من ارقى المدن ببريطانيا ..
وفرونة بيت متوسط الحجم .. كلشي متوفر بي من احسن مايكون ..
وكمت اشتغل وياهم
مندوبة مبيعات بشركة تصدير .. علب البلاستيكية.
جان معمل او شركة بسيطة .. بس شغلها خير .. وعليها طلب
استلم مرتب ..كافي ..
بس تاخرنة يلة طلعت النة اوراق الجوء ..
رغم الحياة المريحة ..
جنت متخوفة ع لحضة انلزم .. اني واهلي
بس الحمدلله كل مخاوفي جانت مجرد قلق .. من الماضي الي ميروح من بالي
ياسين دخلتة مدرسة .. هناك وحيل فرحان بالحياة الجديدة
وامي هم رجعت صحتها ..
اني حياتي تغيرت جذريا ..
بس صار وقت الفراغ يمليها .. ماكو احد ازورة .. ولا صديقات ولانضال ولا سرمد الي جنت عايشة ع امل انو الايام ترجعنة .. بس جان مجرد صدى يرجعلي من داخل روحي
شوية شوية تعمت وبدات اهتم اكثر بشغلي شغلي صار هوة حياتي ..
فديوم المدير .. دز علية
هوة نفسة جان صديق العائلة
اني عرفت نوعا ما شنو يريد
جانت عيونة علية بس احاول اتغاضا هل الشي
رحت .. بقة يحجي مقدمات ويعرعر بالسالفة ..
كتلة .. ابو ئازاد .. احجي العندك من غير هل المقدمات
.. كال بصراحة .. اني اريدج للزواج ..
ام ئازاد من ماتت بعد مزوجت .. واني محتاج وحدة مثلج .. اني وحيد وانتي وحيدة .. تقبلين بية
سكتت ومجاوبتة..
105 viewsㅤㅤㅤㅤㅤㅤ, 17:55