2021-07-16 22:03:57
قواعد وفرمانات كيميائية
1- السكانديوم مستحيل يكون مركبات ملونه او لها عزم مغناطيسي
2- الخارصين مستحيل يكون مركبات ملونه او لها عزم مغناطيسي
3- الخارصين ليس من العناصر الانتقاليه وأي عنصر في مجموعته يبقى زيه مثل الكادميوم والزئبق
4- افضل حديد في الدنيا هو حديد ثلاثي وأي محاوله كيميائيه في الوصول إلى الحديد الثلاثي فهي مرغوبه لذلك من السهل جدا اكسدة الحديد الثنائي وتحويله إلى ثلاثي
5- افضل منجنيز في الدنيا هو منجنيز ثنائي يعني اي محاوله كيميائيه للوصول إلى المنجنيز الثنائي فهي مرغوبه لذلك من السهل اوي اختزال المنجنيز الثلاثي إلى منجنيز ثنائي
6- اي عملية اختزال للاكسيد بتعتمد على درجة الحراره والعامل المختزل
يعني لما تختزل بعامل مختزل غلبان ضعفان صدمان زي اول أكسيد الكربون وتكون درجة الحراره مش عاليه بتلاقي عملية الاختزال مش كامله علشان كدا ماقدرش يحول كل الهيماتيت الثلاثي إلى ثنائي وإنما نتج الماجنتيت "المختلط"
مع ان نفس العامل المختزل المتواضع وهو اول أكسيد الكربون لو استخدمته عند حراره عاليه فوق 700 يقدر يطلعلك حديد..
دا بيثبت ان الحراره لها دور كبير جدا
7- عشان تتكون سبيكه بينيه بين فلزين لازم لازم لازم يكون فيه فرق واضح في نصف القطر، ماينفعش تجيب عنصرين جنب بعض في نفس الدوره وتقولي هعمل سبيكه بينيه
ساعتها هقولك اعمل يا ضنايا. اعمل ياحبيبي. اعمل يا سيدنا دا لو عرفت
يا سنه تالته
لا يجوز شرعا او عرفا او قانونا عمل سبيكه بينيه بين عنصرين متماثلين او متقاربين في نصف القطر!
8- السبيكه البينفلزيه تخضع لاتحاد كيميائي بس لا تخضع لقوانين التكافؤ
زي الشخص المنحرف كدا مش عايز يخضع لقانون او شرع. أهي نفس الفيلم
9- عشان تفرق بين حديد وأي حاجه تاني..
ضيف حمض نيتريك مركز هيتفاعل مع الحاجه التانيه والحديد لا عشان بيسبب ظاهرة الخمول
10- الكيتونات مابتتأكسدش يعني لما يقولك اثر برمنجنات بوتاسيوم عليها او أثر ثاني كرومات بوتاسيوم عليها او اثر اي عامل مؤكسد عليها قوله إلعب غيرها
11- النترات مابتتأكسدش يعني ولا ثاني أكسيد منجنيز يأثر فيها ولا فوق اكسيد الهيدروجين يحوق فيها ولا اي عامل مؤكسد
مابتتأكسدش "مات الكلام"
12- لو لون ماء البروم اختفى وادالك راسب يبقى الماده فينول
13- لو لون ماء البروم اختفى من غير مايكون راسب يبقى الماده ألكين او ألكاين
14- درجة الغليان في الاساس بتعتمد على مجموعات الهيدروكسيل والروابط الهيدروجينيه .. يعني لو مركب فيه كربون كتير بس ماعندوش روابط هيدروچينيه هتلاقي درجة غليانه اقل من مركب عنده كربون اقل شويه لكن بيكون روابط هيدروجينيه
الاولويه للروابط الهيدروچينيه يا سنه تالته
15- الاحماض الاروماتيه تكسب الاليفاتيه في الغليان
16- الاحماض الاروماتيه تكسب الاليفاتيه في الصفات الحامضيه
17- الاحماض الاليفاتيه تكسب اي حد في الذوبان
18- كل لما ذرات الكربون في الاستر بتقل الرائحه بتاعت الاستر بتزيد
19- اقل عدد ذرات كربون في المركب الاروماتي لازم يكون 6 كربون
20- التحلل النشادري للاستر يدي كحول واميد
21- التحلل المائي للاستر في وسط قلوي بيدي ملح الحمض وكحول
22- التحلل المائي للاستر في وسط حامضي بيرجعه تاني حمض وكحول
23- القابليه للاشتعال بتقل لما ذرات الكربون بتزيد
24- الصفه الحامضيه تتناسب طردي مع الاس الهيدروكسيلي PoH
يعني كل لما الصفه الحامضيه تزيد الاس الهيدروكسيلي يزيد
25- الصفه الحامضيه تتناسب عكسي مع الاس الهيدروجيني PH
اخيرا..
ماتبصش على زمايلك وماتقارنش نفسك بحد، خليك في نفسك وإشتغل عليها .. هتوصل.
أحمد يحيى
1.0K viewsG T, 19:03
ك
