- ياشيخ أنا زوجتي متوفية من خمس سنين و شهرين و حوالي ٦ أيام.. | دار مصر - روايات
- ياشيخ أنا زوجتي متوفية من خمس سنين و شهرين و حوالي ٦ أيام.. = انت عادد الأيام ؟ -و ان كنت عايزني اقول لحضرتك عدد الساعات كمان عاددها = يا خبر أبيض !! ، عمر حضرتك كام يا استاذ أشرف ؟ - ٥٦ سنة يا فندم. = و قعدتوا متجوزين قد ايه ؟ - متجوزين من سنة ١٩٨٩ يا فندم. = و متجوزتش بعد ما ماتت ؟ ده عادد الايام و الساعات هيتجوز ازاي بس يا شيخ رمضان !! - هي أحب خلق الله إليّ و إلى قلبي بعد رسول الله صلى الله عليه و سلم ، فهل يجوز للإنسان المسلم اللي زيي إذا ربنا عز و جل منّ عليه بفضله و رحمته و أدخله الجنة و لاقى زوجته في الجنة ، هل يجوز لي أن أستأذن من الرحمن إن أنا مش عايز أتزوج من الحور العين و أكتفي بزوجتي ؟ = يا نهار أبيض !!! * عملت ايه يا استاذ أشرف عشان تخليك تحبها كده ؟ - هي معملتش حاجة ، هي كلها كانت كتلة حب ، انا بقول لحضرتك هي من أفضل خلق الله خَلقًا و خُلقّا.. و الله انا لا أجامل ولا أتجنّى على الله عز و جل ، و ربنا وحده عارف ما احمله لهذه السيدة من خير و حب فانا لا أزكيها على الله و أحسبها من أهل الجنة ، ولا أريد من الله إلا أن أقابلها في الجنة ، و ان كان رزقي في الأرض هو زواجي من هذه السيدة الـ ٢٤ قيراط فانا راضي.