t.me/doctoristishara

2021-09-29 15:48:57 قواعد الشتاء الأربعون
1. عمر المرض ما يجي من النظافه لذلك الطفل يغسل عادي و على نفس النمط صيفا او اقل بشويه مرتين او ثلاث مرات أسبوعيا
2. شتاء العراق جاف لذلك أكثري من الترطيب للجلد بعد الحمام
3. النشله او السعال و الرشح ما تتعالج بشراب التهابات
شويه تنظيف للانف و حمام بخاري و عسل اذا اكبر من عمر سنه كلش كافي
4. التهاب القصيبات بدا مبكرا هذا الموسم فجهاز التبخير على يمينك و قطرات الأنف بيسارك و استعد للشتاء
5. اذا السعال مو قوي و ما مأثر على نوم الطفل مو الا تعالجه فالسعال البسيط يطرد الافرازات المتراكمة
دائما تعامل ويه السعال بمبدأ
Cough is good
6. اتركي خيار استخدام المضاد الحيوي للطبيب
7. ابو الجكاير دخن بره البيت
8. بلا فرو بياقات ملابس الاطفال و قللوا الصوف بالأخص للاطفال اللي عدهم اكزيما او تحسس سواء ملابس طلعه او بيت
9. لا لتعذيب الاطفال بالكمادات البارده
10. اذا الطفل عنده حساسيه أنف بلا استخدام للسبلت
11. لا تنامون و الصوبه مشتغله بالأخص اذا نفطيه
12. احسن مذيب للافرازات هي السوائل الدافيه
13. اذا ما ماخذ لقاح كورونا اخذ
14. اذا تكدر تاخذ لقاح الانفلونزا انت و طفلك اخذ
15. لا تنسى التغذيه الصحيه اهم شي بهذا الموسم
16. كدرت تتعرض للشمس اتعرض بس مو خلف زجاج
17. اضمن حصتك من فيتامين دي بالأخص اذا طفلك عندك تحسس
18. الاطفال اللي عدهم تحسس او مشاكل بالقلب نحرص على ابعادهم من الاطفال و الأشخاص الاخرين المصابين بالفايروسات التنفسيه
19. لو طفلك يداوم و بدت عنده اعراض تنفسيه لأي فايروس تنفسي امنعي طفلك من الذهاب للمدرسه او الروضه
20. التهاب الاذن الوسطى يزداد شتاءا لذلك مهم جدا الفطام من الملهيه اذا عمر الطفل أكبر من ٦ أشهر
و عدم ارضاع الطفل و راسه على جنب
21. قطرات الماء و الملح سلاح مهم و تكدرين تستخدميه عند الحاجه
22. بالاضافه للفايروسات التنفسيه يجي الشتاء وياه فايروس الروتا المشهور بالجفاف السريع و الشديد فنهتم بالتعقيم اكثر
23. لا للمبالغه بالتدفئه و التغطيه فهي عامل خطوره لمتلازمه موت الرضع المفاجئه
24. لا تخلين طفلك ينام و غطا على راسه لان ممكن تنزل على وجهه و تسد مجراه التنفسي
25. تكدرين تلبسيهم جواريب اذا حسوا اطفالك بالبرد و ينامون بيها عادي لا تعمي و لا تأثر على النظر و لا اي شي من هذا الجذب المصفط
26. امهاتنا اللي اطفالهم عدهم تحسس راجعوا طبيبكم ويه اول اعراض تنفسيه حتى يبدي علاج وقائي على طول الشتاء فإني مثلا بديت استخدم البخاخات الموضعيه و انطي جرع من فيتامين دي للاطفال اللي اعرف عدهم تحسس
27. قللي الألعاب اللي بيها فراء او وبر اذا طفلك عنده تحسس
28. كملتي اللقاحات او التزمتي بجدول اللقاحات؟
فأكثر اللقاحات تعطى للفايروسات و بكتريا تسبب امراض تكثر شتاءا
29. الاكل الصحي الخالي من السكريات هو مفتاح لشتاء صحي
30. اهتمي بفقر الدم و نقص الحديد و عالجيه
31. احرصي على نوم طفلك مبكرا فالنوم سر المناعه
32. افتحوا الشبابيك و افتحوا الأبواب و احرصوا على التهويه
33. الشتاء لا يمنع الختان فإذا صدف ولاده طفلك شتاء فسويله ختان بأول شهر لان منافعه اكثر من تاجيله بعد الشهر الأول
34. اكلات الشتاء الروتينيه الصحيه تدعم مناعه طفلك و من اشهرها شوربه العدس و حساء الدجاج
35. حضرتي العسل ؟
بالأخص للاطفال اللي عمرهم أكبر من سنه فهو علاج للسعال احسن من الأدوية
36. ملطف الجو او ال humidifier جهاز اكثر من رائع اذا عندك طفل اقل من ٦ أشهر حتى يرطب جهازه التنفسي
37. كل سنه نفقد أرواح بسبب المدافيء و الاطفال و الحجلات فانتبه لطفا لهذا الخطر ما نريد نخسر او يتاذى طفل بسبب الاهمال
38. احرصي على فحص الماء قبل تنظيف طفلك او غسله و تأكدي انه حرارته مناسبه بيدك قبل أن يلمس الماء طفلك
39. طفح الحفاظات يزداد شتاءا بسبب كثر طبقات الملابس فوق الحفاظ
40. و اخيرا احرصوا من الان على الخروج بانتظام و بالشمس حتى نخزن فيتامين د جيد للشتاء
د. سيف سمير البياتي اخصائي طب الاطفال باز کردن / نظر دهید

2021-09-28 16:10:55 ليش ما ياكل الاطفال !
الموضوع المقلق المزعج لأغلب الأمهات و الآباء
ليش ما ياكل
مختصرها سببين باختصار
اولا :
الاطفال ياكلون أكل من دون أي قيمه غذائيه مثل الجبس و العصير و البيبسي و الشوكولاته و البسكت و الحلويات و غيرها من المواد المليانه مواد حافظه و زيوت مهدرجه و مواد نعلمها و لا نعلمها تؤثر على الامتصاص
كل هذه الاغذيه تسد الشهيه بطريقه من دون أي فائده
عيوني امي ابويه
فكر كطفل اني كدامي أكل مليان سكريات او عصير او جبس بيه ملح و بهار و طعم افضله لو افضل الخضراوات و الفواكه ؟
أكل سكر و ملوحه و عصير و ما اتعب بيه لو اتحمل أكل صلب و اتعب فكي؟
طبعا راح يختار السكريات و العصير
زين عوفك من الأكل المو صحي و صحي و سد الشهيه
شايفين شكد يتحسن ألم بطن الاطفال من تكطعون المشتريات؟
السبب الثاني في فقدان الشهيه
هو عدم تعليم الطفل على تناول طعامه بنفسه
الطفل يسوق بايسكل و يلعب طوبه و يفتح موبايل و ينزل برامج و يلعب بوبجي بس ما معلمته يلزم الأكل يوديه لفمه !!!!!
لو تفتح التلفزيون و تخلي بحلكه الأكل و كأنما الطفل مو بشر ياكل ليسد جوعه فقط مليء الخزان
انت لو نظمتي حياتك و حياه طفلك
و تعبتي بالبدايه
راح ترتاحين اكثر و اكثر
لو دخلتي الأكل و سحبتي الحليب وجبه بوجبه و تقدم بتقدم كان الأمور اسهل
د. سيف سمير البياتي اخصائي طب الاطفال باز کردن / نظر دهید

2021-09-26 11:54:56 الموز
واحد من الخيارات الأولى بتغذيه الرضع
لحظه دكتور خيارات اولى؟
اي نعم خيارات أولى
صح احنا نفضل الحبوب اول شي و الخضراوات بس ماكو جدول معين لادخال الوجبات
بس الموز ممكن كخيار لطيف من الخيارات الأولى لتغذيه الرضع
و التحسس ؟
ماكو اي دليل علمي على ان تأخير ادخال الموز للوجبات راح يقلل التحسس
لذلك ممكن يقدم الموز من ضمن اول ١٠ وجبات لطفلك
نكمل و نروح بعيد
طيب شنو فوائده بحيث يصير من الخيارات الأولى؟
اولا طري و ممكن الطفل يتقبله جدا
و ثانيا غني بالنشويات
و غني بالطاقه
و بيه الياف
و بيه بوتاسيوم عالي
و بيه فيتامين B
زين نجي للمعضله الموز تكتبه دكتور من ضمن علاجك للاسهال بس الموز ندري مسهل فشنو رايك ؟
الموز مثل التفاح ممكن يسوي امساك و ممكن يسهل حركه الامعاء
شون نعرف ؟
الموز كلما ينضج كلما يسهل حركه الامعاء
و كلما مو ناضج و قوي و اخضر يسوي امساك لذلك الموز الأخضر مناسب للاسهال
التفاح كذلك
اللب مالته يسوي امساك
و قشر التفاح يسهل حركه الامعاء و علاج جيد للامساك
هل التحسس للموز شائع؟
على الرغم من انه مشهور انه الموز يسبب تحسس بس الموز مو ضمن قائمه ( Big 8 ) المشهوره اللي تسوي تحسس
لذلك التحسس للموز مو كلش شائع
و يصيب فقط 1 بالميه من الناس
كيف ممكن انطي الموز للرضع ؟
وحده من ميزات الموز هو قوامه اللين و اللي ممكن خلطه مع أي شيء و لهذا ممكن ننطي من اول الخيارات
على منو ممنوع الموز ؟
احنا بالاطفال نكول ماكو شي ممنوع بس اذا الطفل عنده عجز كليه مزمن نفضل تجنبه لان بيه بوتاسيوم
هاي شنو الحجي و الاكزيما مو يزيدها الموز ؟
الموز ممكن و اؤكد على كلمه ممكن يزيد الاكزيما بس مو شرط يزيدها و مالنا غير نجرب نكطع الموز و نشوف هل تحسنت الاكزيما او من ضفنا الموز زادت الاكزيما لو نفسها بقت
يسموها الطريقه
Elimination diet
ما انطي لابني هوايه موز حتى لا يصير عنده حساسيه الموز؟
امي اختي الكريمه
الحساسيه تصير من قضمه او من كيلو لذلك نظريه الكميه مالها علاقه بالتحسس
أحيانا من ياكل الطفل الكثير من الموز يصير عنده نفخه او غازات و أحيانا قيء
و السبب هو عدم تحمل الموز بسبب الألياف اللي بيه مو حساسيه هذه
حساسيه الموز تطيب ؟
ربع الاطفال المتحسسين من الموز راح يطيبون بس يكبرون
بس الباقي يبقون متحسيين منه
اذا عندي حساسيه موز عن شنو امتنع؟
امتنع عن الكيوي و الافوكادو
تغييرات متوقعه بالخروج ؟
امساك او اسهال و الكثير من الألياف السوداء بالخروج
الكثير من المعلومات حول الموز حاولت اختصرها هنا ولو الموضوع كبير كون الموز مفيد و عليه الكثير من المغالطات


د. سيف سمير البياتي اخصائي طب الاطفال باز کردن / نظر دهید

2021-09-25 14:32:04 يلا حبيبي اضرب عمو
...ل على خالو
شون يعيط حمودي على خاله
يلا جر شعر ماما
لو قسم ينطوه تكرمون ال.... و روح اضرب خالو
و مزاح ثقيل ماله اي ٦٠ داعي ينتج عن طفل غير متربي نهائيا
وراها ضحك عنيف على التصرف التافه اللي ماله قيمه
و من الطفل يعصب و يكوم يضربك او يجر شعرك او يتف... عليك تكول هاي ليش هيجي الطفل صاير
و من تطلع و يحرجك أمام الاخرين بتصرف غير مهذب تضربه لان مجرد عكس تربيتك الخطأ!
تصرفك الخطأ
و المجال اللي انطيته لطفلك حتى يسيء الأدب و يتمادى بالخطأ
#الطفل_مرآه_اهله

===

د. سيف سمير البياتي اخصائي باز کردن / نظر دهید

2021-09-23 11:46:50 اول نصيحه حتى لا يغار طفلك من اخوه او اخته
انه ابدا لا تقارنين بينهم
و بلا احساس النديه اللي تخلقوه بينهم
اخوك اكل هوايه
انت لازم تاكل هوايه
اخوك ما يتحرك انت لازم ما تتحرك
انت اشطر من اخوك
و اختك اكسل منك
و هذا الجو المشحون بالحقد المستتر و المنافسات الوهميه
عزز مبدأ sharing is caring
اي ان المشاركه اهتمام
شوف شنو يلعبون بينهم
خليهم يتشاركون باللعبه مو منو يغلب منو
علميهم المساعده و الشغل الجماعي من الدراسه للاعمال المنزليه للعب
اهم من هذا كله لا تفضل واحد منهم على الآخر و لا تجامل واحد على حساب الاخر
لا تكول هذا فقير او حباب
و اخيرا انصحك بشغلتين
لا تبالغ بمدح واحد منهم كدام الاخر
و لا تعيب على واحد منهم كدام الاخر
ابنوا الثقه بالنفس عند كل واحد منهم
لا تخلون مقاييس للنجاح براحتكم
يعني حتى لو اخ احسن من اخوه بالدراسه مثلا فهموه انه ممكن يكون هو متفوق في مجال اخر
اخر ملاحظه : الغيره شعور طبيعي و انساني و الطفل ماله اي ذنب بيه مجرد انه احنا بيدنا نزيده و نزيد حطب على النار او نقلله
#من_الطبيعي_الشعور_بالغيرة
د. سيف سمير البياتي اخصائي طب الاطفال

=====

شارك حتى يستفاد غيرك
===


إستشاره طبيه

معلومات عن مختلف الأمراض وعلاجها


https://t.me/doctoristishara باز کردن / نظر دهید

2021-09-21 22:52:35 اذا ما مشى من العادي جدا انه يتاخر الى ١٨ شهر
التبسم و الضحك
اول ضحكه هي ضحكه ال ٤٠ مثل ما اغلب اهلنا يسموها اي بعمر ٤٠ يوم
ممكن تتاخر الى شهرين
هذه تكون مجرد ابتسامه
الضحكه تتاخر الى ٤ اشهر ووتكون
اخر نقطه بهذا الموضوع
هو التفاعل الاجتماعي
من اول ايام عمره يعرف يتواصل حسيا ويه الناس اللي يحبهم لذلك تشوفه يسكت من امه تحجي وياه يسكت
او من يصير بحضن والده يسكت

بنهايه الشهرين تقريبا يعرف انه هذوله والده و والدته و يبدي يعرف انه هم ذوله اللي يوفروله العنايه
بعمر شهرين يبدي يضحك للاخرين و هذه من التطورات اللطيفه اللي تصير
بعمر ٤ اشهر يبدي يضحك للاخرين و يتفاعل وياهم و يبجي باصوات مميزه عند الجوع او الضجر
هنا احب اوضح نقطه هوايه يكولون انه ابنهم اجتماعي
و الحقيقه هي انه مثل ما قريتوا هذا شي عادي بكل الاطفال بعمر ٤ اشهر
.
بعمر ٦ اشهر راح يبدي ينزعج من الغرباء و ما يحب يتفاعل وياهم و ممكن اصلا يبجي
بهذا العمر ممكن تحدد طفلك هل هو خجول او ودي او جريء او متعاطف
بعمر ٨ اشهر يعرف انه يحس بالامان بوجود والديه
بعمر ٩ الى ١٠ اشهر يبدي توتر الفراق اللي هو يصير من ما يشوف والده او والدته و بالتالي يضوج و يزعل و ينتحس
اخر شي
لا تنسون هذا مو قانون
طفل يختلف عن الثاني
د. سيف سمير البياتي
اخصائي طب الأطفال باز کردن / نظر دهید

2021-09-21 22:52:35 لكل ام جديده رغبتها بانه تشوف ابنها يكعد و يمشي و يحجي باول سنه
هذا البوست هو عن خطوات التطور ؟
ليش التطور مهم؟
لان نعرف من خلاله النمو و الحركه و كلشي
منزل اني الكثير الكثير من البوستات بخصوص التطور
و هذا بوست جديد عن الموضوع
نبدي اولا
السيطره على الراس
بنهايه الشهر الاول يرفع الطفل راسه من يوضع على بطنه
بنهايه الشهر الثاني يرفع راسه ٤٥ درجه من يوضع على بطنه
يبدي يسيطر على راسه بعمر ٤ اشهر ( ١٢٠ ) يوم و من يوضع على بطنه يرفع راسه و حتى اعلى صدره
٦ اشهر يبدي يسيطر على راسه بالتمام و يفر راسه يمين او يسار للتفاعل معاك
بنهايه ال ٧ اشهر يكون مسيطر على راسه كالبالغ
.
.
النقطه الثانية من التطور هي الصوت و الكلام
بالشهرين ٦٠ يوم يبدي يناغي
بنهايه الشهر الثالث يبدي يضحك و يبجي بصوت غير اللي متعوده عليه و السبب هو تطور الحبال الصوتيه
بنهايه الشهر الرابع يبدي يكون حروف العله الانكليزيه مثل o او A او E
بنهايه الشهر السادس راح يبدي يجمع ذني الحروف و يلفظ ewww او Aoeeee
بعدها يبدي يلفظ الحرف الصحيح da
او ma او ba يعني مقطع واحد
بعمر ٩ الى ١٠ شهور يبدي يكول ماما بابا دادا بس ما يقصدها ما يعرف منو
بس مجرد يكولها
. بعمر السنه يكول ٣ كلمات او ٢ اللي هن ماما او بابا او دادا
و ممكن وياها كلمتين مثل لا او تعال او جدو
.
.
التقلب
و هذا يصير من الظهر للبطن بعمر ٤ اشهر
و من البطن للظهر بعمر ٦ اشهر
و ممكن جدا يتركوه و يعبروه الى خطوه تطور اخرى
.
.
الكعده
بال ٤ اشهر يلا نبدي نكعد الطفل بالحضن
المثل الوحيد الصحيح اللي سامعه من اهلنا " بالاربعه ربعوه"
بعمر ٦ اشهر يكعد بخلفيه مقوسه و تكون ايده على ساقه للاتزان
بعمر ٧ الى ٩ اشهر يبدي يكعد و هو مستقر و ما يحتاج ابدا للاتزان
بعمر ١٠ اشهر يبدي يكعد وحده و ما يحتاج مساعده
و بعمر ١٢ شهر يكدر يكعد بعد ما كان واقف
.
.
تطور حاسه النظر
بعد الولاده يكون نظرهم ضعيف و الرؤيه عدهم مغوشه
ما يجذبهم غير الاضاءه القويه
بعمر شهر يبدي يحب الوجوه
بعمر شهرين ما تنتظم حركه العين فعادي تشوف حول يروح و يرجع
بعمر ٣ اشهر يصير توافق بين العين و اليد فيبدي يشوف و يلمس
بعمر ٤ اشهر النظر يتحسن و يشوف الصوره ب ٣ ابعاد احسن مما قبل و يعرف البعد و العمق للصوره تقريبا
بعمر ٥ اشهر يبدي يعرف الوجه المالوف اله اذا مجرد يمر بالغرفه
و يبدي يضحك للاشخاص اللي يحبهم
بعمر ٦ اشهر يشوف و بوضوح كبير الغرفه و غيرها و ابعادها
بعمر ٩ اشهر يكدر يقدر المسافات فتشوف اذا تخليه على مكان عالي يخاف ينزل
بعمر ١٢ شهر يشوف مثل البالغ تماما
.
.
تطور حاسه اللمس
اول ما يولد الطفل من تخلي ايدك على راحته يبدي يسدها
نفس الشي يصير لاصابع القدم
هذا منعكس يختفي مع الايام
بعمر ٦ اشهر يبدي يلزم الاشياء
بعمر ٨ اشهر يبدي يستخدم قاعده الابهام
و بعمر ٩ الى ١٠ اشهر يبدي يستخدم الابهام و يلتقط الاشياء الصغيره
بعمر ١٢ شهر المسكه ممكن تكون معقده و يبدي يستخدم الابهام و الاصبع الوسطي مثلا بالالتقاط
.
.
تطور الوظيفه العقليه
يبدي مبكرا بعمر ٢ شهر و يبدي يتعرف على المحيط و يعرف شنو اللي حوله
اهم وحده بالتطور بالوظيفه العقليه تصير بعمر ٤ اشهر فيبدي يختبرك
يعني يضحك و يشوف شنو استجابتك
او مجرد ينظرلك و يشوف شنو استجابتك و هكذا
بعمر ٦ اشهر يبدي الفضول و يبدي يلمس الاشياء و يكتشفها شويه شويه
بنفس العمر تقريبا يبدي يعرف اسمه
بعمر ٧ الى ٨ اشهر يبدي عنده مبدا الاشتياق و يعرف يلعب الغميضه
بعمر ٩ اشهر يبدي يقلدك بالتصرفات و الحركات لذلك دائما تصرف بوعي امامه لان راح يتعلم منك الاكل و كل العادات الجيده و السيئه
بعمر ١٠ اشهر راح يتصاعد ذكائه اكثر و اكثر و بالتالي اذا خبيت شي عنه كدامه راح يجي و يلكاه
بعمر ١٢ اشهر يبدي يعرف اسماء بعض الاشياء مثل الباب و الشباك و غيرها و وظيفتها
يعرف مثلا انه المشط يستخدموه للتمشيط
و انه التلفون للاتصال
و هكذا
.
.
#baby_development
الزحف
منزل عن انواع الزحف اللي هوايه انواع بيه
يتم الزحف بعمر ٧ الى ٩ اشهر و ممكن جدا يتاخر الى ١١ شهر
الاعتماد على الساقين
ممكن جدا انه بعمر ٤ اشهر انه توكف الطفل على ساقيه
الحركه اللي ابدا ما انصح بيها
بس هي ممكن بهذا العمر
بعمر ٦ اشهر من توكفه يبدي يركص نصيحلها
اللي هي يحرك نفسه وقوفا و جلوسا
Bounces
بعمر ٩ اشهر راح يبدي يوكف لوحده بانه يسحب شي او يرتكز على شي
بعمر ١٢ شهر راح يبدي يوكف وحده و مو الا يمشي
اذا مشى كم خطوه فمعناها الامور جيده و التطور ماشي بصوره صحيحه باز کردن / نظر دهید

2021-09-20 14:23:27 فوائد السبانغ و الاطفال؟
السبانغ من الخضراوات المشهوره بغناها بفيتامين a و الحديد و الالياف و الحديد و فيتامين سي
من اي عمر أكدر انطي السبانغ ؟
السبانغ من الخضراوات اللي ممكن تصير سائله القوام و ممكن اعطاؤها بعمر 6 إلى 8 أشهر
كيف اطبخ السبانغ لطفلي ؟
اولا اختار السبانغ الطازج
ثانيا اغسله بماء بارد
ثالثا اخذ الأوراق فقط دون السيقان
رابعا الأوراق ممكن تسلق الان على البخار
خامسا اجه دور الخلاط و ممكن خلط السبانغ بحليب الطفل الطبيعي او الصناعي و ممكن خلطه مع الخضراوات
هذه اسهل وصفه
و طبعا ممكن تحضيره كجزء من السلطات او مع البيض او مع اللحم
شنو فوائد السبانغ ؟
صديق الامعاء لاحتوائه على الألياف
جيد للعظام لان تخيلوا ١٠٠ غرام بيه ٩٥ ملغرام كالسيوم !!!
جيد للعضلات لان مصدر للبروتين
جيد للمناعه لان بيه فيتامين K و سي
مسهل طبيعي
السبانغ جيد للاطفال بكل الأعمار و يضمن الإبتعاد عن فقر الدم اذا اخذ بكميات معتدله
السبانغ مو بس مفيد للاطفال بل مفيد للمراهقين فبدراسه اجريت بأمريكا لاحظوا ان المراهقين اللي يتناولون الخضراوات الغنيه بفيتامين K تكون صحه قلبهم افضل !!!!
نجي للمصابين بالسكر
فهو يوصف بسوبر فود لان يحافظ على مستوى السكر بالدم و يحتوي على ٤٠ بالميه من المغنيسيوم اللي تحتاجه
و بيه ماده تنزل السكر للنوع الثاني من السكر !
كوب واحد من السبانغ بيه ٦ ملغرام حديد و هو يعادل ثلث ما تحتاجه من حديد بيومك
كميه الفيتامين سي تساعد على المحافظه على شعر صحي اكثر و جلد ارق
الصدمه: ان البوتاسيوم بالسبانغ اكثر من البوتاسيوم بالموز !!!!
البوتاسيوم معروف انه يحافظ على صحه الجهاز الهضمي و الكبد و الجهاز العصبي
و آخر معلومه انه صديق رائع للريجيم و الرشاقه
د. سيف سمير البياتي اخصائي طب الاطفال باز کردن / نظر دهید

2021-09-19 16:02:49 احب توصيات الجمعيه الامريكيه لطب الاطفال
الجمعيه الامريكيه لطب الاطفال جمعيه تشمل ٣٠ الف طبيب و عدها اراء خاصه بيها تختلف عن اراء كل الجمعيات الاخرى في قضايا مختلفه منها ختان الاولاد مثلا
فالختان تشجع عليه بحيث الكثير من الامريكان صاروا يختنون اولادهم على عكس اوربا اللي الختان بيها صعب و معقد
الخريطه دليل على معدلات الختان بالعالم و تشوف انه امريكا تجي بعد الدول الاسلاميه من حيث الختان
نذكر و قبل ما يبدي الشتاء
الختان المبكر هو الافضل
و الافضل بيد جراح اطفال او جراح عام او جراح اختصاص مجاري بوليه
و الافضل هو الختان الجراحي
و نذكر انه توصيات الجمعية الامريكيه لطب الاطفال تكول انه ( اذا ردت تسوي ختان فسويه مبكرا )
الختان بامريكا اكثره يتم ثاني يوم
و ماله علاقه الختان بصيف او شتاء
لا تاذون اطفالكم بتاخير ختانهم بعد الشهر لان يترك اثر نفسي كبير عليه
و للامهات اللي راح يولدون بالشتاء ماله علاقه الجو انطلقوا و ختنوا طفلكم
حتى مضاعفات الجراحه تتضاعف ٣ اضعاف بعد عبور الشهر
بالاخير و من اتعب من اي نقاش اكول بكيفكم طفلكم لو طفلي
ابني سويتله ختان ثاني يوم من عمره و صارت ولادته بالشتاء البارد
يستثنى من ذلك الاطفال اللي طهورهم ملائكي او غير مكتملي النمو او صغر حجم العضو لذلك الافضل يفحصه الطبيب قبل الختان
د. سيف سمير البياتي اخصائي طب الاطفال باز کردن / نظر دهید

2021-09-18 17:44:36 تدعيم حليب الام
حليب الام هو الغذاء المثالي لكل طفل
بس العلم دائما يسعى للكمال لذلك لابد من تكميله بفيتامينات و عناصر مهمه و اغذيه
نبديها من البدايه
فيتامين K
هذا يعطى على شكل ابره عضلي 1 ملغرام
و يعطى للكل سواء رضاعته طبيعي او صناعي
الجيد انه مستشفياتنا الحكوميه دا تنطيه و بعض المستشفيات الاهليه دا تنطيه و نامل انه يوصل هذا البوست للقابلات حتى يبدون ينطوه
الجرعه هي 1 ملغرام عضلي بالفخذ
فيتامين دي D
هذا يعطى من اول يوم و للاطفال اللي رضاعتهم طبيعي بالاخص
ليش؟
لان حليب القواطي اللتر الواحد بيه بيه 400 وحده دوليه و حليب الام بيه فقط 25 وحده دوليه
و الا الام تاخذ 6000 وحده دوليه يلا ينزل بالحليب !!
و هم ما مضمون
لذلك لا بد من اخذ فيتامين دي للاطفال اللي يرضعون طبيعي
الماء : حليبك 90% منه ماء فما يحتاج ماء
الحديد بعمر 4 اشهر بجرعه وقائيه او بدء بعض الاغذيه الغنيه بالحديد بعمر 4 اشهر او بعدها بقليل
ادخال الاغذيه ضروري و مو مجرد تعليم للطفل و مو رفاهيه
ادخال الاغذيه هو لادخال العناصر المفقوده اللي ما يوفرها الحليب الطبيعي
دام وصلتي لعمر ٤ اشهر و طفلك بدا يفضل الرضاعه الطبيعيه و يكره الرضاعه الصناعيه هاهيه استمري فقط بالرضاعه الطبيعيه فقط و لن يؤثر ذلك بشيء على نموه
اذا وصلتي لعمر 6 اشهر او قبلها بشويه و رحتي للعمل و ما ناطيه حليب صناعي او تنطين مره او اثنين حليب صناعي اكولك كافي ما يحتاج
انطي اكل و دخلي اللبن و بعض الاطعمه المصنوعه من الحليب و ماكو داعي للمميه
استمري بالرضاعه الطبيعيه الى عمر سنة مع الطعام و بعد السنه القرار بالاستمرار يعود لك و لطفلك
اما اللي تدخل حليب صناعي و هي اجازتها تخلص بعد سنه اكولها لا تفكرين اصلا لان ماكو احد يريد يفوت بالفطام مرتين
هو الفطام من المميه بعمر سنه كافي
كملي رضاعه طبيعيه و بلا مميات
د. سيف سمير البياتي اخصائي طب الاطفال باز کردن / نظر دهید