علذكر جماعة الانسانية الكثرانين (اللي فاهمين الانسانية بحجي اللسان بس ) حته تعرفون ليش بلطوارئ نضوج من الكيسات الباردة و ليش مرات منقبل نستقبلهه حته لا يستنفذ طاقة و وقت و علاج غيرة احق بيه( و قانونيا من حق المقيم ان يمتنع عن كتابة علاج لأي مريض غير طارئ بعد تقييم الحالة)
راح اسولف موقفين قبل ٤ سنوات و هاي المواقف حقيقية وياي شخصيا ،، و كل يوميه تتكرر مثلهه عشرات و مئات ويه غيري والله لو جاهل جاهل عمرة خمس سنين لا فاهم و لا دارس و لا يعرف يحجي هم ميسويهه لان يعرف غلط ،، حته لا يجي واحد يگول الناس متعرف الطارئ من المو طارئ فهلموقف اجهل الجهال يعرفه غلط (و كاتبتهه بلغة العامة لان كان منشور بكروب عام مو طبي )
مرة اجت مريضة للطوارئ ( مو حالة طارئة) عدهه ابو صفار بسيط صارلة كذا يوم و اتذكرت المغرب تجي للطوارئ ، مع هذا استقبلتهه و قستلهه كل الفعاليات الحيويه و فحصتهه كلشي طبيعي عدا ابو صفار اللي هوه التهاب كبد نوع A اللي يروح بدون علاج ممكن و اذا تحتاج علاج تروح للاستشارية الصبح لأن متشكي من اي اعراض و لا اوجاع ، المهم ما اقتنعت بهلكلام و بقت تدردم بهلاثناء اكو مريضة عجز قلب حاد و دخلت بعجز تنفسي و خلولهه انبوب تنفس و عايشة على الهوة اللي يدفعة الطبيب بجهاز يدوي اسمة ambo bag ،، يعني اذا توكف ايد الطبيب ثواني ممكن تموت المريضة و صارت (سكتة قلبية) فلازم انعاش قلبي رئوي cpr فركضنه عليهه بدينه انعاش و صدمات كهربائية يعني موقف مرعب لأي شخص حتلو جاهل هم راح يعرف شنو انعاش و شنو صدمات،،، فأجت اخت هاي المريضة ام ابو صفار فتحت البردة مال سرير( واني صاعدة فوك السرير و اضغط علگلب المريضة!!) و جان تگولي عيني شنو انتي عفتينه و رحتي عله هاي المريضة و هيه اجت ورانه!!!!! داكولهه مريضة دتموت انتضري اكمل و ارجعلج تكولي والله اني هم عندي مريضة قبل هاي اجينه!!
و هيه دتشوفني بهلوضع!!!
يعني شايفين انعدام الانسانيه اللي عدهه!!! !! يعني هاي اذا ارزلهه اصير بلا انسانية!!!!؟ تخيل امك هاي الدتموت و تجيك هيج وحدة ميعجبهه تنتظر و هيه اصلا مو حالة طارئة؟ بلله هم تسيطر على اعصابك و ما ترزلهه؟؟
يعني مرة واحد اتعارك و كلب الدنيا و هوه كلشي ما بيه بس ميعجبه يشرب حبوب و الا تكتبولي ابر بلمغذي (واكيد هذا لو ما قابلين ننطيه العلاج اليريدة جان صرنه بلا انسانيه من وجهة نظرة) بلمقابل تدرون شسوة؟؟!! حجز سرير و بهلاثناء اجت مريضة عجز قلب اوكسجينهه ٦٥ و لونهه صاير ازرگ نركض من سرير السرير نريد مكان نخليلهه اوكسجين مركزي ماكو سرير!! وصلناله نكوله بس كوم علكرسي نخلي المريضة علمود الاوكسجين جاي تموت!! يكول والله هذاك الكرسي مو مريح و اني هم مريض ما اكوم من مكاني!!!! وبقت المريضة مختنكة و الحد ما جبنالهه اوكسجين بطل و علكرسي المتحرك مالتهه بنص الطوارئ!!!
يعني وين الانسانية!!! هذا مو جان المفروض من البداية منقبل نصرفلة علاج بلطوارئ حته مياخذ مكان غيرة احق بيه؟!! يعني فوك مسوينه زين تجنباً للمشاكل فوكاهه مريضة ممكن ماتت بسببه!!؟ هاي الانسانية التردوهه؟؟
اني ما اكول غير انو ادعي الله ميخليك بمثل موقف هاي المرة اللي يمكن ماتت وراي و تلكي واحد مثل هذا و غيرة و غيرة اللي تارسين الطوارئ و ميقبلون يروحون للاستشارية لان ميردون يلزمون سرة لو تجيج تكولج والله شيوديني للاستشارية و انتظر الطبخ علنار اريد ارجع!!
الانسان اللي يتجرد من انسانيته و يزاحم المرضى الطارئيين يستاهل واحد يتعامل وياه بأنسانية؟؟؟!!
الموقف الثالث بلضبط مثل الاول بس هاي قبل شهر تقريبا بس الفرق جان المريض واكع من عمارة و راسة متهشم و نزيف بلدماغ و الدم تارس الغرفة و اني لابسة بدلة عمليات زركة صاير لونهه احمر من كثر الدم و متكومين عليه ناس تخلي كانيولات و ناس تشدله دم و ناس تفحص بيه و هم وقف التنفس مالته و طبيب التخدير خلاله انبوب تنفس و عايش علامبو باگ الحدما نلكيله مكان بلعناية المركزة
و اجه ابو مريضة من الاستشارية اصلا مو من الطوارئ يدور علطبيبة الجراحة اللي بلطوارئ لأن ما عاجبه ينتظر بلاستشارية علاخصائي الجراحة اجاني و اني بهلمنظر يم المريض و يعيط و يدردم والله شنو صارلي ساعة ادور عليج و تعاي يلله افحصي بتي بطنهه توجعهه؟!!! عمو انته دتشوف الموقف احنه شنسوي؟؟ اي و اني شعليه هم مريضتي بطنهه توجعهه و ما اريد انتظر بلاستشارية!!!!
بلطوارئ ممكن حياة مرضى تخسرهه بسبب هلنماذج فمن تريد تحجي بلانسانية اعرف انو الانسانية الهه اهلهه ،، و الحالة اللي انته تعتبر معالجتهه انسانيه بلنسبة لطبيب الطوارئ عدم معالجتهه في سبيل نحفظ حياة غيرهه هيه الانسانية بحد ذاته
