كاعد تنطي الام روحها و تغذي طفلها بالحليب الطبيعي و على غفله و | إستشارة طبية
كاعد تنطي الام روحها و تغذي طفلها بالحليب الطبيعي و على غفله و بدون سابق انذار قل الحليب !!! شنو الاسباب وشنو الحلول راح يناقشها هذا البوست قله احتياج الطفل للحليب جسمنا عجيب و الطريقه اللي يتعامل بيها الثدي مع الحليب و انتاجه عجيبه اكثر لما يقل احتياج طفلك للحليب و يبدي ينام لفترات طويله مثلا يبدي الجسم يقلل انتاج الحليب لذلك دائما اكول للامهات " المميه المساعد هي بدايه النهايه للرضاعه الطبيعيه راح تخبرين جسمك انه طفلك ما محتاج للحليب و راح يقل انتاج الحليب و راح يقل شغفه بحليب الام و بالتالي يتوجه للرضاعه الصناعيه من الحليب البقري " و الحل : الاكثار من الرضاعه حتى لو بس رضاعه ليليه او عدم ادخال المميه بعد استقرار انتاج الحليب اذا الطفل ظل رافض الحليب اسحبي الحليب و خزنيه هذا راح يعطي ايعاز انه الطفل بعده ما ماخذ كفايته حبوب منع الحمل سبب اخر لقله انتاج الحليب حتى الامينه منها للمرضع و السبب التغييرات الهرمونيه اللي تسويها و الحل : تغيير طريقه منع الحمل الى طريقه اخرى عدا حبوب منع الحمل تناول بعض الاكلات قد ينقص انتاج الحليب !!!! اهم وحده بيهم النعناع اكيد مره او ٢ ما تاثر بس اذا الموضوع متكرر راح ياثر على انتاج الحليب النعناع و المعدنوس ( البقدونس ) و الخباز و الزعتر يقللون الحليب معلومه اخرى هي علك النعناع و الحلويات اللي بيها طعم نعناع بالمقابل موجوده قائمه طويله عريضه ممكن تزيد انتاجه من الحلبه الى الزيوت الى الاجبان و التمر و غيرها موجود بوست عن هذا الموضوع بالصفحه بعض الادويه تقلل انتاج الحليب مثل السودافيد اللي بيه ماده علميه اسمها السودوفدرين اللي موجوده بعدد من شرابات السعال ماده المنثول موجوده كذلك في بعض شرابات السعال تقلل الحليب قله شرب الماء و قله التغذيه الام لازم تهتم بصحتها و اكلها و تاكل اكل متوازن غني بكل العناصر الغذائيه و شويه ناجل الريجيم اذا كان انتاج الحليب قليل او على الحافه ابدا ما اكول انه لا تسوين ريجيم بس قللي سقف طموحاتك يعني اذا ناويه تنزلين كيلوين بالشهر خليها كيلو بالشهر ثم الرضاعه الطبيعيه اصلا تضعف و تعادل مشي ٣ الى ٥ كيلومترات و تفقدك بالمعدل ٥٠٠ كيلوكالوري فاهتمي بنفسك و اكلك و تغذيتك القاتل رقم ١ لانتاج الحليب هو الشد النفسي و العصبي لذلك خليك هادئه اطلبي المساعده من زوجك والدتك اختك اي احد متوفر اعرفي انه ماكو شي تام اعرفي ان الامومه صعبه و قرارتها مو هينه خليك دائما مرتاحه و هادئه انت دا تقدمين كل اللي عندك لطفلك و دا تسخرين وقتك كله لشخص اخر انت الافضل انت الام طفلك مو هو اللي اختارك فخليك خياره الحلو
