نحن نتاج ما ناكل ! تسأل فلانه دكتور ابني بس يتمرض يكوم من م | إستشارة طبية
نحن نتاج ما ناكل ! تسأل فلانه دكتور ابني بس يتمرض يكوم من مرض يكعد بمرض اخر ! يلا خلينا نتناقش شنو ياكل شنو يشرب شنو ظروف سكنك ! شياكل ؟جبس و عصير و شيشرب ؟ مميه و كم مميه عنده ؟ بس وحده و شنو ظروف سكنك؟ احنا ٣ عوائل بالبيت و كل واحد مخلف ٢ إلى ٣ و ادزه الطفل للحضانه لان عندي دوام تعالوا بالله عليكم نفتهم منين يجي المرض وراها راح تعرفين ليش يتمرض الطفل هوايه الطفل ما يتمرض من الحمام او من الجو مثل ما يطيب لهوايه من الناس ! كل امراض الاطفال عدوى نبدي كلش من الصفر اولا اذا ما تفورين المميه قبل كل رضعه لا تعتبرين نفسك معقمه المميه و اذا ما عندك بمعدل ٦ إلى ٨ مميات لكل طفل حتى تفوريهن او تعقميهن مره وحده باليوم فما راح تنطين حق الرضاعه الصناعيه تغسلين المميه او تجلفيها او تغسليها بملح او تغسليها بمي حار كلها ما تفيد اذا ما تفورين المميه قبل كل رضعه احنا عايشين بدوله من دول العالم الثالث شئنا او أبينا! و لهذا الرضاعه الطبيعيه اسهل و انظف و اكثر تعقيما و اقل حدوثا للمضاعفات و الالتهابات المعويه ثانيا كوننا عايشين بدوله من دول العالم الثالث فان نظافه الطعام المقدم من خارج المنزل تخلين عليها علامه استفهام لذلك حاله الاسهال اللي جتي لطفلك ممكن جدا من تناول جبس ملوث مو من الاستبراد! و ان لفه الشاورما من فلان مطعم هي السبب بدخول حمودي ابن أمنه المستشفى لان صار بيه اسهال و قيء و ان قطعه الجبس الصغيره من ايد بنت اختك هي اللي سوت بابنك جفاف من وره الجرثومه الموجوده بالجبس ثالثا العصير صفر قيمه غذائيه طبيعي او صناعي رابعا كلما عدد الاطفال اكثر كلما عدد الامراض اكثر و اذا عندك تحسس قصبات فضروري جدا تحديد الاختلاط كما حددنا الاختلاط بكورونا خامسا اذا الطفل يروح للروضة عادي يصير عندي ١٢ نشله بالسنه و اكثر في حين ان الطفل اللي يكعد بالبيت عادي يصير عنده ٥ إلى ٦ نشلات شفتي الفرق؟ اي بمقدار الضعف هذا الفرق فدائما حاولي تلكين الروضه الاقل عدد سادسا اذا الطعام ما بيه حليب و لا لبن و لا لحم و لا فواكه و لا كل الأصناف منين تجي المناعه ! سابعا البروبايوتك خلوها من أساسيات يومكم و بالعراق عدنا اللبن بيه بروبايوتك و حليب الام بيه بروبايوتك و اكثر و اكثر كاعد تتوفر منتجات بيها بروبايوتك بأشكال مختلفه للاستعمال اليومي الوقائي و كاعد اشوف عليه فرق صار ٣ سنوات تقريبا ثامنا لا للمبالغه بالتغطيه الطفل اللي يتغطى زايد راح ينحرم من فيتامين دي و راح ينحرم من المناعه تاسعا النوم الوفير اساس المناعه لا نوم لا مناعه لو تاخذ كل الفيتامينات و كل البروبايوتكات و كل المعادن عاشرا اختصرها ب: 1. نظافه 2. غسل مرتين اسبوعيا للطفل 3. فيتامين دي من اول يوم 4. رضعي طبيعي 5. غذاء متكامل كلشي بيه 6. بعيد عن السكريات 7. ما نجيب طفل رقم اثنين الا تكون لطفل رقم واحد غرفه منفصله 8. نقلل الفرش و نزيد التهويه و التعرض للشمس 9. بروبايوتك من اول يوم 10. ابتعاد قدر الإمكان عن المضادات الحيويه الا بوصفه طبيب دمتم بود د. سيف سمير البياتي اخصائي طب الاطفال
