وزن الاطفال وزن الاطفال من اكثر المواضيع اللي تقلق الاب و ا | إستشارة طبية
وزن الاطفال وزن الاطفال من اكثر المواضيع اللي تقلق الاب و الام و الجد و الجده و الطبيب و اكيد نستلم عليها تعليقات من الخال و العم و العمه و كل احد نعرفه و ما نعرفه في اغلب الحالات يكون ماكو اي داعي للقلق و لا يحتاج شي و لا يحتاج الموضوع اكثر من التطمين بس المشكله بالنظره العامه انه ( هو سمين اذا هو صحي ) خلوني اشرحلكم شويه ع الوزن الوزن اول ما نبدي بيه نكول شكد وزن الولاده شكد طول الطفل شكد محيط راسه و نتابع شويه شويه يعني اللي وزنه ٢ و نص نموه بعمر ٦ اشهر اكيد ما يصير مثل اللي اجه بوزن ٤ كيلوات المهم ما علينا باول اسبوع ينزل الوزن و يرجع لوزن الولاده بعمر ٧ الى ١٠ ايام و هذا شي طبيعي جدا و مو الا ندخل المميه يعني الطفل اللي وزنه ٢.٥ كغم راح يفقد ربع كيلو من وزنه و يرجع للكيلوين و نص بعمر ال ١٠ ايام !! هنا مع الاسف هوايه يضيفون الحليب الصناعي و هذا خطا فهذا فقدان الوزن طبيعي عبرنا اول ١٠ ايام راح يبدي يزيد الطفل بمعدل ٢٥ غرام الى ٣٠ غرام يوميا يعني ١٥٠ الى ٢٠٠ غرام اسبوعيا و هذا باول ٣ اشهر . وصلنا و عبرنا الى عمر ١٥٠ يوم هنا اذا مضاعف وزن الولاده فالامور اوكي يعني ابو ٣ كيلوات صار ٦ كيلوات اوكي و ابو ٤ كيلوات صار ٨ كيلوات فاوكي ممكن حواليها هم مو مهم معدل النمو يبدي يقل شويه شويه خلال الاشهر التاليه و بعمر السنه الوزن يصير ٣ امثال وزن الولاده يعني ؟ ابو ٣ كيلوات عند الولاده بعمر السنه يصير وزنه ٩ كيلو ! لهنا حلو؟ نعبر للسنه الثانيه السنه الثانيه كلها ما يزيد بيها اكثر من كيلوين الى كيلوين و نصف !! اي نعم احنا ما نكبر بنفس الوتيره و الا كان ما تكفينا الكره الارضيه اصلا بعدها نبدي نزداد بمعدل ثابت اللي هو كيلو و نصف الى كيلوين هذه الارقام هي لتكوين المسار اللي يمشي عليه الطفل نعرف وزنه طوله شكد كاعد يمشي شون كاعد يصعد او لا سمح الله ينزل و هذه يتابعها طبيبك وياك من يقيس الوزن و الطول و يخليه على المسار و يتدخل و يضيف حليب مثلا او يضيف فيتامينات او يضيف حتى مشهي اذا نزل كلش عن هذا المسار ما نحجي هنا ع الطول لان حتى طول الام و الاب مهم بالاعمار فوق سنتين و احيانا كثيره اقيسها من اشك بالطول مو طبيعي اللي اريد اوصله هنا الموضوع مو موضوع قسته اليوم اي هاهيه الموضوع يحتاج متابعه و متابعه لسنين لما نوصل لبر الامان و نوصل لعمر ال ١٨ سنه اعرف انه مو الكل تكدر تطبق هذا الكلام لان مو الكل تراجع اطباء بس ببساطه نكدر نسجل اوزان و اطوال الاطفال على اقل تقدير د. سيف سمير البياتي اخصائي طب الاطفال