التحويل من الاكل السهل إلى الاكل الصلب موضوع حلو خلي احجيلكم | إستشارة طبية
التحويل من الاكل السهل إلى الاكل الصلب موضوع حلو خلي احجيلكم عنه؟ اكل الطفل يمر بعده مراحل من الحليب إلى الاكل اللين إلى اكل أكثر صلابه إلى طعام الأصابع اللي هو الاكل المقطع و دائما نسمع السؤال و الشكوى دكتور ابني عمره ١٨ شهر و ما ياكل اكل صلب دكتور ابني عمره سنتين و ما ياكل اكل صلب خلي نبدي من البدايه كلش المرحله الأولى اللي بالبدايه كلها تبدي بيها اللي هي فوح التمن او الاكل المصنوع من ماده وحده و يتخفف بالمي ممكن هذا الاكل يتثخن بحليب الطفل أو حليب الام عادي بهاي المرحله نص الاكل يدخل فم الطفل نصه بره المرحله الثانيه هذا تبدين تسويه لاكل المرحله الأولى اثخن كأنما كريمه مخفوقه عادي تكدرين تنطيه هذه المرحله بعمر ٨ إلى ١٠ اشهر و من اسهل التحويلات المرحله الثالثه هنا تضيفين قطع صغيره للاكل المصنوع بالمرحله الثانيه قطع خفيفه هشه دائما بهالعمر اكو اسنان ممكن تقطع هذه القطع آخر مرحله هي مرحله طعام الأصابع و هذه مرحله ممكن تبديها وره المرحله الثالثه او بعد المرحله الأولى و طبعا من شروطها انه الاكل طري و ما يشكل خطر للاختناق على الطفل مثال بسيط عليها هو المعكرونه طيب دكتور شكرا جزيلا شرحت المراحل بس ليش ضروري هالتفاصيل؟ لان ببساطه الطفل يحتاج إلى هذه المراحل حتى يتطور أكثر و أكثر يحتاج إلى تقويه عظام الفك حتى يبدي يتكلم قريتي؟ اي عضلات الاكل هي نفسها عضلات الكلام شون احول من مرحله إلى مرحله؟ هذه بيها نقاط هوايه ١. قللي نسبه الماء بالطعام شويه شويه ٢. بمكان استخدام محضره الطعام أو الخلاط استخدمي الشوكه او الملعقه لهرس الطعام حتى يكون قوام الطعام اثخن ٣. ضيفي بعض المواد اللي تثخن دائما انصح باستخدام اللبن بالفواكه مثل فراوله و لبن او خوخ مهروس و لبن ٤. طعام الأصابع خيار جيد للبدايه تعلمه على الاستقلال ٥. ابدي انطيه من اكل البيت الصحي بس على شرط لا ملح لا سكر لا بهارات شكد اكدر اوكل طفلي؟ من اسهل الاسئله هو راح يكولك ببساطه راح يدير وجهه يعني شبع خلص عادي راح تكولين و الله بخت الأمهات الجديده راح يمشون على هذا البوست بس احنا اللي امهات قديمات و عمر ابني ١٦ شهر و ما ياكل بس اكل سائل شنسوي ؟ انتظري !!! كوني صبوره ماكو طفل يشبه طفل ممكن اصلا طفلك يتقيا بس ياكل اكل بيه قطعه صلبه هذا العادي انتظري فقط دامه يبلع الاكل السائل هذا ما عنده مشكله انتظري فقط تذكري بس انه وقت الاكل لازم يكون وقت خالي من التوتر و مليء باللعب و البهجه اكو مجنونات تضرب طفلها علمود ياكل !!!! اريد اشوفها هي تاكل لو احد يجبرها بنفس الطريقه؟ بالأخير لا تقلقين راح يتحسن شويه شويه اكله و اكيد لا مانع من مراجعه طبيب الأطفال القريب عليك حتى يشوف اذا اكو مشكله بالوزن و الطول د. سيف سمير البياتي اخصائي طب الأطفال
