اليوم هو ٩ نيسان و بمثل هذا اليوم قبل 20 سنة كان يوم سقوط بغد | إستشارة طبية
اليوم هو ٩ نيسان و بمثل هذا اليوم قبل 20 سنة كان يوم سقوط بغداد و احتلال المحتل لارضنا هذا اليوم و اللي اجه بعده من الايام كان من اسوء الايام على اطفالنا العديد من الدراسات و البحوث على وضع العراق كان يؤكد لحد سنه ٢٠١١ وجود ٤ ملايين يتيم بالعراق ٧٠ بالميه منهم توفى احد والديهم بعد ٢٠٠٣ مو بس هاي امتد تاثير الحرب حتى على الاطفال اللي بارحام امهاتهم و تشوهوا الكثير منهم هذه دراسة لتاثير الحرب على اسنان الاطفال https://link.springer.com/article/10.1007/s10661-016-5491-0 ٣.٥ مليون طفل يعيشون تحت خط الفقر ١.٥ مليون طفل يعيشون مع سوء تغذية لحد العام اللي مضى ٦٥٨ الف طفل نازح داخليا حسب تقرير اليونسيف لحد نهايه العام الماضي مليون طفل يحتاجون الى ماء نظيف ٣.٣ مليون طفل يحتاجون الى دعم للدراسة رجعنا هوايه بالظلام و الخرافات و الاعتقادات الخاطئه بالتربية و الصحة رجعنا الى ايام العشرينات من كانوا كلشي يعالجوه بالنفط و الطين و الكبريت و الثوم و الكوي و الخرز و الخرق من كان كلشي ماكو و لا حتى البنسلين بعدهم مخترعيه و لا اكو شي اسمه لقاح نحتاج الى الامل بغد افضل نحتاج الى العمل لغد افضل نحتاج انه نبدي ببيتنا بوطننا الصغير نعزز روح المواطنه اللي عند اولادنا حتى يعيشون لغد افضل غد خالي من العصابات و القتل و الطائفية و المناطقية وطن بيه الحرية للمعتقد و الدين و المذهب بعيدا عن كل تدخل و ايذاء للاخر كلشي يرجع و كلشي يتصلح الا نفوس الاطفال اللي تاذت صعب جدا لملمتها ديروا بالكم على اولادكم خلوهم بحضنكم احضنوهم قبلوهم انطوهم حنان قبل ما تنطوهم الخبز خليكم متفائلين بغد افضل اني متفائل انه نكدر نغير للافضل و نكدر د. سيف سمير البياتي اخصائي طب الاطفال
