مدرعنة،إيّش .

2022-06-28 17:44:01 حاولت، و مازلت نحاول، حتى لو ما وصلتش، ع الأقل إسمي حاولت . باز کردن / نظر دهید

2022-06-28 17:04:01 كنت في المول متبشمطة مالشمس كأني قطعة قديد منشورة علي حبل دبش في سونية حوش قديم و وشاحي كأني طالعة بعويلتي الستة و طاحنتها نا وياه في السيارة و جاية ندور في قفطان فرح صبيتي و شارقة، ف توكلت على الله و رقيت دروج نقطع فيهن جهدي عشان نخش الحمام أكرمكم الله نبرم علي هالزول و نبرد شوي بمية مسقعة و إذ ب البنغلاديشية اللي تنظف فيه تقولي لا ما تخشيش الفتاشة مسكرة و المية مغرقة الدنيا أنزلي للحمام اللي لوطة بكلّ أصرار و خشونة.. لِوهلة أستحضرني مشهد لما نقعد نسيّق في الأسوار و منحرق دمّي يخشو العولّة دايرين خط و نقهرهم في عمارهم و نقوللهم ما فيش خشوش بكرعيكم و قلت فعلاً يا داير يا لاقي و شفت روحي فيها، سكتت شوية لتحكمني النذالة فجأة بعد ما حسّيت أن المراوغة و الجلاطة مش حيجيبن نتيجة و بإرتجال لحظي قلتلها أنا مريضة سكّر! و ضروري نخش للحمام كلّ شوية! تأثرت هيّ و تأثرت أنا و تأثرت السياقة اللي في يدها و طبّست راسي كنوع منن إضافة حبكة دراماتيكيّة للمشهد و تعاطفت معايا و قالتلي خشي و هيّ نادمة علي لطّتها ليا و خشيت رقت و صوّرت و سقمت وشاحي و درت عطري و طلعت نطنقش و ما حسيتش بأي ندم و بأمانة حتى نا ما توقعتش توصل بيا للرزالة هذي . باز کردن / نظر دهید

2022-06-24 00:11:01 مَتوهمش نفسك ان مكانك عند شخصك مكان كبير بكل، لأن أول ما يصدر "رنين الفعل" يبيّن أن أنتَ زيك زي غيرك، هتعيش شعور كأنك كنت في جبل عالي وطحت منه وكان في خاطرك حد يمسكك بس للأسف أنتَ " حتحمل مسؤلية غبائك " عشان هك الطيحة هذي صاح تكسرك بس تخليك تعرف أن لازم تركز على الأفعال مش الكلام . باز کردن / نظر دهید

2022-06-23 16:03:01 ديما نبو الحاجة البعيدة المش ساهلة اللي أتمررنا بيش نوصلو فيها، تجي فِي يدينا نزهدو ودروحه معش عجبتنا وطلعت مش نفس مامتصورين، والحقيقة أنّ مش الحاجات اللي فِي يدينا هنّا اللي شينات، الحقيقة أنّ خصايلنا هنّا اللي معفنة . باز کردن / نظر دهید

2022-06-23 09:08:01 رغم خشم الجامعة والحمو والقمطرة ..
صباح الخير . باز کردن / نظر دهید

2022-06-20 21:18:01 حالنا منصوب بفتح الجراح؛ وجراح القلب لا ضم لها في هذا الزمان ! باز کردن / نظر دهید

2022-06-19 22:09:01 ﴿وَلَا تُرۡهِقۡنِي مِنۡ أَمۡرِي عُسۡرٗا﴾ باز کردن / نظر دهید

2022-06-19 18:05:02 تعريف يوم الأحد هو عبارة عن يوم طويل كان صيف صهد و دواخ و كان شتاء غراقات و زحمة ..
يتميّز يوم الأحد بالأحداث السيئة و الأشخاص الكلوطين يوم الأحد هو هاجس حاولت أجيالاً قبلنا تغيير ركوده و الحدة من جموده دون جدوى حيث أن حتى وجك حتحس فيه حاجة غلط و تقعد مش طايقك و مش حتكون راضي علي تصرفاتك ولا ردود أفعالك و أكثر وجبة تكرها سيتم طبخها في يومك اللعين هذا، لذا فإن الحل الأمثل عزيزي القارئ هو سبات الدب القطبي دون الخروج لمواجهة العالم دون المحاولة في الإصلاح دون أتخاذ أي قررات لأنك حتماً ستندم عليها حين تعود لرشدك في نهاية الأسبوع و ما عليك إلّا النوم طويلاً أملاً في إنتهاء هذا اليوم الرديء . باز کردن / نظر دهید

2022-06-13 00:11:01 محطّمين و ما والي جايب منّا علم .. باز کردن / نظر دهید

2022-06-12 19:06:01 لما تخسر حاجة و المقصود بالخسارة هنا الخسارة الحقيقية الملموسة بعيداً عن التلذذ بحالة الضحية الفاقدة الشيء، خسارة حاجة كانت بالنسبة لك مهمّة و تعنيك و متوقفة عليها حياتك حتى لو كانت في نظر الأخرين صغيرة و ما تنشافش..
حاجة حطيت فيها كلّ جهودك و سعيت و حاولت بكل قوّتك من دون جدوى و كانت النتيجة مش مرضية، بعد بروزت شرف المحاولة و حطيته علي جنب !
تقدر أدير خطوة أولى جذريّة و هي "القبول" كونك تقبلت الخسارة معناها قدرت تعيش الحالة متاعها و أقتنعت بتقلّبات الحياة و تعايشت مع إضطراباتها أمنت أن الفترة المختلفة الحالية حتمر و يبن يجن فترات أخرى غيرها ممكن يكونن أكبر و بيعدن برضو و فهمت أن الأيّام مش كلهن زي بعضهن، أنت هك تفاديت مرحلة فارغة مرحلة الندم و الأعتراض اللي حتاكل روحك و مش حتغير شي غير أنّها تأخرك عالفاضي..
أنت هك مشيت خطوة قدام خطوة ماشيها بثقة و ثبات و دارس اللي صار كويّس..
تجربة دفعت ثمنها "خسارة" أبداً ما كانتش ساهلة بالنسبة لك لكنك بطل و تجاوزتها، خسارة كسبت منها خبرة عمر و طلعت منها إنسان جديد، جديد كلياً مش ممكن يعاود أخطائه مرتين ولا في حاجة حتردّه لاورا أبداً . باز کردن / نظر دهید