2023-05-22 21:00:51
أول شئ لازم تخللون ببالكم هالأيام مرحلة تحديد مصير هالسنة لازم تستخدمون كللل طاقتكم وتبذلللون كللل جهدكم
تتوكلون وتگولون يا رب توكلت عليك سهل لي الصعب واكتب لي توفيقك
شنوو رح تكون طريقتنا بهالأيام الجميلة ؟
نصحى الفجر كلللش ضروري نصحى ويا صلاة الفجر نصلي نقرأ قرآن/أدعية وراها نسوي تأمل ١٠ دقائق (آني مجربته شگد مفيد لطرد الأفكار السلبية) نشرب ماء / كوب قهوة/حليب... إلخ المفضل عندكم
نبلش نقرأ. شلوون نقرأ ؟ بطريقة الپومودرو يعني نقرأ ٢٥ دقيقة نرتاح ٥ دقائق أو نقرأ ٥٠ دقيقة نرتاح ١٠ دقائق
فترة الراحة مو نلزم بيها التلفون لا نرتاح نسترخي نغسل نتمشى نروح نخبث ع واحد من العائلة ونرجع سوي إللي يريحكم بس مو شئ مُجهد للعقل.
نسوي فد دورة أو دورتين من الدراسة وراها نتريگ ( ماكوو ما أحب اتريگ أو آكل حلويات من ع الصبح )حاولوا يكون صحي لأنه أهم وجبة باليوم.
نرجع نقرأ قراءة زينة وبذكاء وبجهد وبتركيز. شلوون يعني بذكاء؟
يعني مثلاً عندك نقاط اربطهم ببعضهم، سويهم قصة، نكتة أي شيء مثلاً نملة شايلة قطار وطلع دب من الغابة وصعد فوگ القطار خخخ تخيلوا يعني هيچ اشياء unusual مرح تنسي.
أو سووا خرائط ذهنية هم متنسي
الاشياء إللي تنسوها جيبوا ورقة بيضاء وأقلام ألوان وكتبوا النقطة أو الجملة بخط كبير ع ورقة وخلوها قريبة عليكم أو علگوها گدامكم وكل شوية باعوا عليها.
وبعد الحفظ المتكرر يفيدكم يعني شغلة تعرفونها مهمة أو چاپتر أو موضوع تريدون تضبطونه. قريتوه مثلاً هسسة ارجعوا له ورا ساعة راجعوا مراجعة سريعة وأرجعوا له بالليل هم وثاني يوم ونوب تركوا يوم وأرجعوا له راجعوا وبعد ارجعوا بنهاية الأسبوع رح يطبع بدماغكم.
نرجع لخطتنا تقرأوون لفترة معينة وراها إن حسيتوا بنعس ناموا نص ساعة( هالكلام تكون ساعة ٩ أو ١٠) ونگعد نأكل شئ خفيف، نشرب عصير ونرجع نكمل دراسة لحد صلاة الظهر نصلي ونتغدا أو نصلي ونرجع نقرأ حدما يصير الغدا
ووراها نرجع نقرأ ( إن كنا حاسين بتعب ننام نصف ساعة إذا نمنا الصبح وساعة إذا منمنا الصبح) مووو تجرررووها نوومة للعصر وتخربون الأول والتالي. ديرروبالكم
فـ تستمروون ع هالطريقة قراءة واستراحة لحدما يخلص النهار
وحاولوا تراجعوون كلل إللي قريتوه قبل لتنامون حتى لو تصفح سريع واحمدوا الله بنهاية النهار وادعوه يوفقكم وانو تصحون ثاني يوم الفجر وناموا من وقتكم وتعيدون نفس الشئ ثاني.
@EnglishDepartment_3
3.8K viewsزهــɴɢᴜــرا۽ , 18:00
E
