سنی هاچان سئودیم بئله؟ هئچ اوزومده بیلمه‌میشم
آییلدیم کی یئری‌ییب‌سن اوره‌ییمین دامارینا
بلکه بودا بیر یوخودور، من هئچ سنی گورمه‌میشم
بلکه کونول اومسوق اولوب حسرتینه، اومارینا
سانکی دومان داغدان آشیب، اهمال اهمال دولدو کنده
یاواش یاواش، ذره ذره آلدین کونول قالاسینی
هئچ بیلمه‌دیم هاچان، نئجه، کونول دوشدو بو کمنده
سانکی خیردا اوشاق توتدو کورپه سئرچه بالاسینی
من هئچ سنین بئله گوزل اولدوغونو بیلمز ایدیم
بالیق دنیزده یاشاییب، دنیزی گورمه‌ین کیمی
اوره‌یین ده، باخیشین دا، گولوشونده گوزل ایمیش
ایپک ساچلیم! نئجه بئله بیردن بیره گوزل‌لندین؟
دوداقلارین گوزل‌لمه، باخیشلارین غزل ایمیش
سنی سئودیم، یوز قات داها، مین قات داها غزل‌لندین
سنی کوهنه شراب کیمی دوداغیمدا تامسینیرام
آدین تزه موراببادیر، دیلیم آغزیم شیرینله‌نیر
سنی جانیما چکیرم ذره ذره، گرام گرام
سنی سئودیکجه جانیمدا، روحوم جانیم درینله‌نیر
یانان سئوگی اوجاغی‌دیر، یاری مظلوم، یاری مغرور
کیمی اونو ثواب گورور، کیمی اونو گوناه بیلیر
اوردا بیر یول وار اوزاقدا، او یول بیزیم یولوموزدور
او اوزاق یول هارا گئدر، نئجه گئدر، آللاه بیلیر
فرمان فرضی/ اسفند ۱۴۰۰
