تو ولمستو كان كبير ،، دا مجنون ولا مالو ما نصيح وعايز يبقيني ز | الكادي
تو ولمستو كان كبير ،، دا مجنون ولا مالو ما نصيح وعايز يبقيني زيو اظن ما علينا ختيتا جوه وقفلتو في مكانو ،، نمته فترة لكن صحيت بي صوت شكلة بره وسامعة صوت بابا منفعل ،، واصوات تانية معاه بتكلمو ،، قمت وسريع سريع مهجومة بلمس قدامي اطلع بره ،، جا صوت خالي مالو ود عزيزة ناس مرتاحين ومحترمين التعرسو وهم بقدرو يتكفلو بيها لي رسوم العملية ،، سمعت صوت بابا قال ليه انت اطلع منها اخر الزمن جاي تشور علي اعرس بتي لي منو،، جا صوت حبوبة ،، يا ولدي كدي استهدي بالله اخوك الكبير كلامو صاح ،، نحن ندبر ليك القروش دي كلا من وين ،، اديها للبريحها وبسعدا وبقدر يعالجا ،، وكل شي بجي تاني لي قدام .. انا بتي لسه صغيرة وما عايز اعرسا لو تبقي حياتا كلها ما بتشوف ما بعرس ليها القلتو علي دا ،، جا صوت زوجة خالي واضح وبصوت عالي هي ما بتشوف فايدتا شنو تاني ،، كرووو رووو نطيت بالصوت العالي والحاجة الوقعت دي وبقت الكواريك اعلا ،، شكلو بابا ضرب حاجة لانو كان منفعل وبدا يكورك .. انتي اسكتي ولمي اولادك عليك ولا اقول ليك وقت عايزة القروش ما تعرسي لي بتك اسلام دي ووقت تفلس بي تطلق تاني اصلكم معودين علي كدا ،، الليلة وووووب سمعت السكلبة دي ،، شكلهم بقو يتضاربو خالي وبابا بسبب كلامو القالو بقيت ماشة وخايفة بنادي بابا بابا انت وينك بابا ،، جاني صوت حبوبة عشتار اقيفي ابوك هدا كويس تعالي ادخلك جوه ارقدي ،، بقيت ببكي لالا انا عايزة بابا ما اطمنت الا لما حسيت بيه وهو بحضني وكان نفسو قايم وعرقان،، بابا انت كويس ساقني ودخلنا جوه قال لي انا قدمت شكوي ضد الدكتور العمل ليك العملية في السفارة وانا متأكد انو حا نربح القضية لانو موقفنا قوي ،، كان خبر حلووووو لي فرحت شديد وقعدت انطط لما بابا ضحك،، المهم عدي شهر وطيلة الشهر دا كان وسام بديني كل يوم شي وانا اموت واعرف ديل شنو ،، بس بديت افقد الامل وماف جديد بحصل ما اتصلو بينا ولا رسلو ايميل يورونا الحاصل ،، كل يوم بمشي وانا حالتي بتسوء زيادة ،، شلت تلفوني اتزكرت سامر ،، ناديت بابا يتصل لي بي رقمو الكان سجلتو منو ،، حسيت انو ممكن يفهمني واكونوصداقة معاه ،، قال لي دا منو؟ صديق معانا في الجامعة عرفتو قبل اسافر فتش الاسم القلت ليه عليه واتصل لي بالرقم ،، الووو جاني الصوت اول اتوترته .. هاي سامر انا عشتار عشتار منو؟ عشتار ال معاك في الجامعة مرة جيت اتعرفت بي انا؟ ياه وطلبت رقمي بس انا شلت رقمك وقلت ليك بتصل عليك انا .. انا ما بعرف بت بالاسم دا وتاني ما تتصلي علي هنا وطق قفل الخط..
وصلني ردو وهو اكيد عرف بالحصل بي ،، بابا حضني عليه قوي وقال لي معليش انا جمبك واقرب صديق ليك وقتها اتعلمت انو مهما الناس عملت روحها انها حساسة لمشاعر التانين ،، برضو ما بحس بالالم دا الا صاحبو .. زن زززن بابا انت لسه بتعمل تلفونك هزاز .. قعد يضحك ورد عليه فجأة قام علي حيلو وزح مني ،، وكمان فجأة سكت مسافة ،، وفجأة التالته قعد يكورك وشالني من مكاني بقي لافي بي ،، بابا بابا حا توقعني في شنو عشتار عشتار نحن طلبنا اتقبل خلاص حا تتعالجي حا تبقي كويسة دموعو نقطت فيني كان فرحان اكتر مني وهو شايلني بلف بي ،، اخيرا نحن ح نسافر ،، بس ح نسافر بدون عودة تاني ...
