2021-02-11 21:08:28
السلام عليكم
شباب كيف حالكم
-أنا خنساء احمد علي
- 20 سنة
-بدرس مختبرات كيميائيه /المستوي التاني/جامعة السودان للعلوم والتكنولوجبا
-مصورة فتوغرافية
-كاتبة
-مصممة جرافيك
-مهتمة باللغات(متحدثه للانجليزيه والاسبانيه)
-freelance translator
-freelance graphic and designer
-سفيرة بمؤسسة قوم امشي أقرا التعليمية
-متطوعة بشارع الحوادث
-المدير التنفيذي لمبادرة اشرقت للتنمية الإنسانية والتوعوية
-عضو المكتب الاعلامي لمبادرة كفاح
-مصصمة جرافيك لدي المكتب الإعلامي لمبادرة انت استثنائي
-founder of N&R shop
-كاتبة بمنصة مبدعون
-مدربه في Volunteer hub organization
-حاصله على شهادة مشاركة من Hult prize
بحب العمل الطوعي جداً ومتمنية انو اقدم مع قوم امشي أقرا عمل مميز ونقدر نخدم المؤسسة بصوره ممتازه بحيث انو نحقق أهدافه.
أول حاجه حابه أقولها كونك تعافر وتعافر عشان تصل لي ال انت عاوزو ف دة أبداً ما عيب، كونك تكون ماري بمشاكل وصعوبات نفسيه، مامعناه إنك زول عاجز أو إنك ماحتنجز، بالعكس المشاكل والصعوبات بتقويك عشان تحارب وتنجز
من زمان كنته شغوفه جداً بالدراسه، والحمدلله ربنا كان واقف معاي في كل خطواتي،
وصلته الثانوي وطبعاً كان حلمي إني ادخل مجال طبي وكده وبالضبط كنته عاوزه كلية صيدله، حصلت احداث كتيرة جداً وشائت الاقدار ودخلته مختبرات كيميائية جامعة السودان، ولسه للآن فيني الرغبه في انو أقرا صيدلة
و ان شاء الله طال الزمن ولا قصر حادخل المجال دة
عاوزة أقول ليكم انو الدراسة وحب العلم والتطور عمرو ماكان ساهل العندو الإرادة بقدر يتعلم، حاولو اتعلموا اي حاجه نفسكم فيها، تركيزكم واهدافكم مش بس تخلوها على المساق الدراسي والعملي بتاعكم ، حاولو اطلعو خارج الكونفرزون يجماعة، مارسو هوايتكم، اعملو الحاجات البتحبوها، اتجننو، اااي اتجننو واعملو حاجات مجنونه في سبيل انكم تصلو للعاوزنو
يمكن اكون اتعلمته المسؤوليه وانا في عمر صغير، بس الحاجه دي فادتني شديد، وقعته وبكيت واتوجعته وتاني اتنفضته وقمته على حيلي، وربنا دايماً ملجأ الامان الوحيد لي والدايماً كان واقف معاي في كل خطواتي، دعم الأهل والأصحاب الفعلاً أصحاب برضو بمثل جانب كبير من نجاحاتك وإنجازاتك
والحمدلله حالياً بجتهد بقدر الإمكان في شغلي ودراستي.
بديت تصوير ودخلته المجال عن حب بالضبط قبل سنتين، رجعته لمجال الكتابة وكنتة مستمتعة جداً ، 2020 كانت سنة الانجازات بالنسبه لي، بديت كونت شغلي الخاص وعملته براند خاصه بي، بديت تطوع في المنظمات الطوعية ، شاركت في فعاليات كتيرة جداً ،،
كانت سنه محبطه وسنة إنجازات في نفس الوقت
قدمته في برنامج صناعة المتطوع ووصلته للتصفيات النهائيه بس قدر الله وماشاء فعل وما اختاروني ضمن الفريق النهائي
اتاثرته بالموضوع شديد وكنته محبطه جداً ، جات بعدها فعاليات مسابقة هالت برايز والحمدلله حصلته على شهادة مشاركة وكانت بمثابة فخر لي والله،
جات فترة ضغط الامتحانات والجامعة وكده والواحد بقى مندمج مع القرايه والحمدلله خلصته امتحانات وقررته انو حاقدم في ال VMC السنه القادمة و وحاعبر منها ان شاء الله .
حالياً امتحنته الامتحانات النهائية للغة الاسبانيه وان شاء الله ساعيه لانو اتعلم الكتير والكتير عنها واتعلم كم لغة بالاضافه للانجليزيه والاسبانية ان شاء الله، كتابي "السمندل" حيتم اصدارو في أبريل بإذن الله، ويعتبر أول مؤلفه لي،
ولسه ماشين في السكه نمد
معرفتي للناس بقت في زياده، يعني مكان ما امشي بلقى ناس بتعرفني وأنا في الحقيقة مبسوطة جداً بكل النجاح الوصلته ليهو ، ماكنته متخيله انو لما يكون عمري 20 سنة، حاكون عانيت ومريت بكل الحاجات دي، بس شكراً شديد لي كل لحظه ضعف خلتني قوية وقادرة أكون بالقوة الحالياً أنا فيها ، وحادخل ع ال21سنة ولسه حاشوف وحاشوف الكتير.
اذا محتاجين اي مساعدة في واحدة من المجالات المكتوبة في الأعلى
دة رابط صفحتي
https://www.facebook.com/ahmed.nosa.718
تتواصلو معاي وبخدمكم على طول
آسفه على الإطالة، ومبسوطة جدا بانضمامي لي قوم امشي أقرا
أخيراً كنصيحه
ماتحكم على نفسك بالعجز وانت ما حاولت تقوم
عمرو الزمن ما بيداوي جروحك البداوي جروحك إنجازاتك نجاحاتك تفوقك إبداعك هم البساعدوك تتخطى كل المُر المر بيك،
دايماً بحب اركز مع الناس المجتهده والبتشتغل على نفسها ويمكن دة اللي دائماً بيديني دافع إني اكمل وابني نفسي واكون افضل واتطور ، دائماً تابعو الناس الايجابيه والمجتهده حتلقو حتى طريقة تفكيركم اتغيرت
الكارير بتاعتك مفروض تأخد Your first prioraity في عمرك حق العشرينات.
(لا يكفي التوصل إلى النجاح المهم أن نبقى ناجحين).
#قوم_امشي_أقرا
#تجارب_السفراء
3.5K views18:08
ق
