محرررررم 1443 هـ علي الأكبر ع عمت عيني عله اوليدي مشه وفارگني | الشاعر حيدر الحلفي
محرررررم 1443 هـ علي الأكبر ع
عمت عيني عله اوليدي مشه وفارگني بهداي
عمت عيني انذبح ضامي ويصد اوليدي عالماي
منو المثلي يلم بيديه . جسم إبنه الذي امطشريه
عمت عيني
عمت عيني عله اوليدي البقى مطروح . ويعت بالروح . حبيب الروح
جريب اعله الفرات او ما يضوگ الماي . حسافة ارباي . بلايه افياي
عمت عيني عله اجروحه وجماليتة
وگع دامي وانه بيدية لميته
علي الخيمة حبيبة گلبة وديته
ابحضن أمه حبيبي ابإيدي خليته
ابحضن أمه غفه اوليدي تشوفة امگطع اوصال
ابحضن أمه أعز ناسي طريح ودمعي همال
أبو شايل بديه غاليه . وجسم إبنه الذي امطشريه
عمت عيني
_______________________
مشه تعب الربه إمن ايدي ومشيت اوياه . لعند الآه . هضمني اضماه
اشحلاة اعيونة واوصافة علي اشمحلاه . يهد فرگاه . حلم أنساه
ينور الله ابوجه إبني أشوفنة
علي ولو عفتة كل عمري أعوفنة
نوه قبلي يموت ابني أعرفنة
صعب تعب العمر بيدية ادفننة
اشكثر يامه اگعدت يمه وسوالف حلوه وياه
اشكثر يامه حضن صدري واقبل ذيچه عيناه
گلب والد يحن ادريه . وجسم إبني الذي امطشريه
عمت عيني
________________________
بدية لملمت جسمة اشكثر لميت . متت ياريت . انه ولا جيت
ألمنة ويرد يوگع واللم اردود . صعوبة ايعود . ترى المفگود
منو المثلي يلم جسم ابنه عالغبرة
منو اليگدر يطلع سهمه من صدرة
انه شفت الولد طايح على ضهره
وصحت من عمري لوليدي على عمره
تون ليلى وتون زينب عله ابني الودع وراح
تون ليلى على جثتة مشه إمن الدنيا وارتاح
يهد گلبي علي طاريه . وجسم إبني الذي امطشريه
عمت عيني
______________________
إجت سكنة تون يمه ويخوي اتصيح . عليه اتطيح . ودماه اتسيح
يالاكبر ها يگلب اختك يبعد اچلاي . دگوم اوياي . يضي عيناي
دگوم الأختك احتاجت تگف يمك
وابوسنك يضي اعيوني واشتمك
اصبغت هالشيلة يالأكبر انه ابدمك
انه اشتاگيت انامن بس على جسمك
انچوه گلبي لَمَن شفتك يخويه ابلايه أنفاس
انچوه گلبي على أمك اشكثر لطمت عله الراس
دمع والد عليه اجريه . وجسم ابني الذي امطشريه
عمت عيني
________________________
تصيح امه انعمت عيني شبابك راح . حملت اجراح . اشوكت ترتاح
جبت عمرك يبعد امك اشكثر مهموم . لحد اليوم . علي مظلوم
اكبرت يبني على إيدي وسهرت اشگد
علي وجرحك كبر يمى ولا ينشد
يباب الفرگه من بعدك ولا ينسد
أبوك انفارگه وما يبقى عندي احد
بعد ساعة واشوفنة أبوك امدد اوياك
بعد ساعة يگطعونة حبيبك يمك اهناك
ضهر أمك عليك احنيه . جسم ابني الذي امطشريه
عمت عيني
حيدر الحلفي
