#الليالي_الفاطمية الليله زينب خل نضل يم عتبة الباب بلكت امنه ا | الشاعر حيدر الحلفي

#الليالي_الفاطمية
الليله زينب خل نضل يم عتبة الباب
بلكت امنه اترد علينه والضلع طاب
ولصبح لو ما اجت . يعني معناها مشت
بلكت امنه اترد علينه والضلع طاب

الليله منام .. آنا وانتي يالعقيله نشكي همنه
ومو بالاحلام .. بلكت ايصير الصبح وانلاگي امنه
لو نضل عام .. المهم ترجع يزينب ما يهمنه
احله ايام .. بلكي ترجع والزجيه اترد تضمنه

خلي ندعي هسه وانصلي ركعتين
رجع الزهره يرب لو حتى يومين
هالليالي لو گضت . يعني معناها مشت
بلكت امنه اترد علينه والضلع طاب
ـــــــــــــــــــــ
سهري وياي . طبع اليسافر يجي من يلفي صبحه
وصبري بهداي . تعرفين الننطره مكسور جنحه
طلبتي هاي . الباب من يندگ يزينب آنا افتحه
اعرف الجاي . من بعيد اخيال امي آنا المحه

من تمر نسمة هوى واتحرك الباب
ينخمش گلبي واظن دگات الاحباب
الباب لو متحركت . يعني معناها مشت
بلكت امنه اترد علينه والضلع طاب
ـــــــــــــــــــــــــ
البعد طال . خويه يم الباب خل ننصب عزيه
المصطفى گال . كل عزه تحضر اله الزهره الزجيه
بلكي بالحال . تحضر امنه ابهالعزه هاي المسيه
اترد الآمال . واشبگ امي من جديد ابهاي اديه

لگضي كل عمري عزه حتى امي متروح
وانصب الها مأتم ابنص گلبي والروح
ولو ثواني اتأخرت . يعني معناها مشت
بلكت امنه اترد علينه والضلع طاب
ــــــــــــــــــــــــــــــ

ننصب اليوم . خويه يم الباب مأتم واحنه ننعه
المجلس ايدوم . رايد الزهره إمن اون صوتي تسمعه
سود الهدوم . لابسه او بيديها لو جت شفنه شمعه
رأسن انگوم . يختي باب الدار بيدينه نشلعه

خوفي لو عالباب تنضر تلگه بسمار
او تذكر السطره يخويه او تذكر النار
لو ضلعها اتذكرت . يعني معناها مشت
بلكت امنه اترد علينه والضلع طاب
ــــــــــــــــــــــــــــــــ
برض الطفوف . نلتقي لو ما تجي هسه امنه يمنه
تحضر اتشوف . شلون يالحره يحرگوهن خيمنه
تنضر اجفوف . واگعات اعله النهر يمهن علمنه
تزحف ازحوف . من تشاهد عالثرى يتجاره دمنه

اتدور اعليه يخويه او تلگه بس راس
وتنضر الجسمي ابخيول العشره ينداس
صبعي لو بس شاهدت . يعني معناها مشت
بلكت امنه اترد علينه والضلع طاب
ـــــــــــــــــــــــــــــــــ

دهرج اشضام . لو تعود امنه تخبرج يالعقيله
قصة الشام . يختي تحتاج الشرحها الف ليله
حضري الجدام . رحله عندج بالسبي باجر طويله
اتنطرج اخيام . بالطفوف او تنطرج ناگه هزيله

ابكربله أمج تشوفيها اويه الاطفال
ابهاي اديهم يالعقيله اتشوف الحبال
لو اديهم ورمت . يعني معناها مشت
بلكت امنه اترد علينه والضلع طاب

حيدر الحلفي