#الليالي_الفاطمية آخر ساعة .. ابحضني اتنام يوليدي آخر ساعة . | الشاعر حيدر الحلفي
#الليالي_الفاطمية
آخر ساعة .. ابحضني اتنام يوليدي
آخر ساعة .. تلزم إيدينك إيدي
دللول الأخيرة . أگول وكلي حيرة
آخر ساعة . آخر ساعة
إشبع مني او أشبع منك لهفة وشبگة
آخر شوگ او آخر حب او آخر ملگة
شم صدر امك . سولف همك . خل اشتمك . يبني ابحرگة
صد لعيوني او إشبع شوف إمن امك هسه
ثوب الأسود يابو اليمة اعله امك لبسه
حزنك يبدي . من اتودي . جثتي الوحدي
او كسري اتحسه
يالما تدري .. دفني ايصير ابهالليلة
يالما تدري .. نعشي ابإيديك اتشيلة
حياة امك گصيرة . أگول وكلي حيرة
آخر ساعة . آخر ساعة
________
نام ابحضني وخلي انفاسي ابريتك تجري
ابگربك ملك الموت اتمنة ياخذ عمري
آخر لحظة . الگلبي ونبضة . يمك ترضى
يوگف أدري
منهو ايلوليلك من بعدي ابحضنة ايخلك
ويمى اصباح الخير إحسيني منهو ايگلك
ابهاي الشيلة . آخر ليلة . دمعك سيلة
يابعد اهلك
حنيّت امك .. منهو ايعوضها ابروحك
حنيت امك .. راحت ماتگضي اجروحك
يبو اجروح الچبيرة . أگول وكلي حيرة
آخر ساعة . آخر ساعة
________
أيام العيد اتهد روحك يبني اتهدك
اتشوف اللي ابعمرك ويه امه وانته الوحدك
ابابك تگعد . وين اتعيد . يمى اتردد
دمعة ابخدك
فرحانة الناس او بس انته لابس أسود
يم گبري اتعيد يوليدي او حيلك ينهد
چيه عيديتك . ماكو بيتك . تبچي ادريتك
وبابك ينسد
ازغير بعدك .. وشاهدت امك مدفونة
ازغير بعدك .. المثلك ماتبچي اعيونة
يجرحي المالي غيرة . أگول وكلي حيرة
آخر ساعة . آخر ساعة
________
أول ليلة ايتعبك يبني افراگي ايتعبك
گوه اتجر انفاسك گوه ينبض گلبك
واشيگضيها . اتضل تبچيها . ماتت بيها
شمعة دربك
عالباب اتظل گاعد يبني ليلك كله
تاخذ ثوبي ابحضنك ياضي عيني اتخلة
اترسة ابدمعك . بس شينفعك . ومنهو ايسمعك
ابروحك علة
منهو ايگلك .. يحسين الله ايعظّم اجرك
منهو ايگلك .. افراگ الأم حيل ايكسرك
النظر يمك أديرة . أگول وكلي حيرة
آخر ساعة . آخر ساعة
________
يالغافي ابأحظاني باچر تغفة ابصحرة
برض الطف يوليدي او خيل اتسحگك عشرة
امگطع كلك . منهو ايحملك . منهو ايغسلك
يبن الزهرة
شمس العاشر تذبح يبني اتغير لونك
وكل لحظة الخيمات الحره اتصد اعيونك
تنظر زينب . گعدت تنحب . اتدور تشرب
ماي الحره
ايودي الزينب .. باچر راسك چتالك
ايودي الزينب .. خنصر إيديك اگبالك
أون حيل الظهيرة . أگول وكلي حيرة
آخر ساعة . آخر ساعة
حيدر الحلفي
