#أم_البنين_ع_ يدري بية الراح يدري جبتة عمري انياح عمري كله ا | الشاعر حيدر الحلفي

#أم_البنين_ع_

يدري بية الراح يدري جبتة عمري انياح
عمري كله اهموم عمري هذا آخر يوم
يدري ماغمض جفن . إله يحظر بالدفن
هذا آخر يوم

يدري محبوبي الجفاني هاي اخير انفاس
يدري آخر يوم اعيشة وبية ليه احساس
أندعي في كل فرض . ربي ويه آخر نبض . يحظر الغالي واكظ . إيدة وي عباس
هيچي وابآخر ثواني يمي يحظر كون
أمنية يارب ردتها يمه اسد لعيون
أمنية كل والدة . ابحظن ابنها اموسدة . لو حظر موتي او بدة . ايگلي وحدي شلون

روحي شوفة اتريد روحي والتريدة ابعيد
نوحي من فرگاه نوحي ونـة وآه او آه
أندعي كون الإبن . إله يحظر بالدفن
هذا آخر يوم
____
يدري دگ بابي مماتي وحظر التابوت
ابلهفة ناطرتة اعله ابابي اتأمليتة ايفوت
حتى نبضات الگلب . شابحة البابي وتصب . بلكي محبوبي يطب . ومنه أسمع صوت
أقره قرآن او أصلي واندعي لغروب
ربي ويه الله أكبر يوصل المحبوب
ابحي على خير العمل . ربي بشرني ابأمل . وگلي محبوبچ وصل . وخلي گلبي ايذوب

أمه حگي ادعيت أمه شوفتة اتمنيت
هضمة وكت البين هضمة يمي ماكو إحسين
اعلية چا منهو اليون . إله يحظر بالدفن
هذا آخر يوم
____
أنتظر هدهد يجيني ايگلي إبنچ جاي
بلكي وابآخر ثواني إمن ايدة أشرب ماي
نگعد انسولف سوى . ينترس بيتي ضوه . وبي أشمن نينوى . ويبقى ساعة اوياي
اهواية مشتاگة أگلة يا حبيب الروح
اهواية متلهفة الشبگتة او حچيه المملوح
العندة مثل ابني ولف . كله حنية وترف . دمعة لا ماظن يجف . لو بعيد ايروح

شيبي طش بالراس شيبي واصل الأنفاس
غيّبي هايورود غيّبي إبني لا ميعود
مايهد گلبي الحزن . إله يحظر بالدفن
هذا آخر يوم
____
آنه كل خوفي يجيني ابلا جسد بس راس
وآنه متعودة حبيبي عالصدر ينباس
لو سألتة اعله الجسم . خلي واعرف ينلچم . مايگلي منثلم . جسمي كله انداس
من اصدنها رگبتة خوفي اشوف ادماه
والشمر راسة اعله رمحة بالشمس خلاه
يلچم اهواية الرمح . ابنحرة چم ضربة وجرح . وبالرمح خلوا ملح . واشكثر أذاه

راسة يجرح بيه راسة اشگد دمه امغطيه
جاسة شمر شلون جاسة ودمة سد لعيون
ما أموتن چا أظن . إله يحظر بالدفن
هذا آخر يوم
____
أرد اسألنة اعله جسمة چم رمح ظل بيه
چم سهم نام اعله صدرة والرمل ماذيه
ياجرح ياذي بعد . صدرة لو فگد الولد . لو من الكافل فگد . ياجرح يچويه
لو ظمة عبدالله هدة لو حرگ لخيام
لو ركض زينب وحيدة اتدور الأيتام
لو رقية من اجت . اتدورة بس ما لگت . منحرة وگعدت بچت . إله يمه اتنام

طفة كله اجروح طفة مابقت بي روح
چفة هم مگطوع چفة مثل اخوه موجوع
اشگد ردت شوفة او أحن . إله يحظر بالدفن
هذا آخر يوم

حيدر الحلفي