#ياكاظم_الغيض دعيت الله .. وقريت ازيارة العاشر دعيت الله .. ط | الشاعر حيدر الحلفي
#ياكاظم_الغيض
دعيت الله .. وقريت ازيارة العاشر
دعيت الله .. طلعتي إمن السجن باچر
يربي ابجاه الحسين الحسين
أشوف اهلي ضوه العين ضوه العين
دعيت الله
ارفعت إيدي ودموع العين تتجارة
وتوسلت الإلاه آنه ابهالزيارة
أسلم عالحُسين وروحي محتارة
يبو اليمة أريد اليوم البشارة
حُسين حُسين .. گمت اصيحن بالسجن
حُسين حُسين .. اتعذبت گد ما أون
حُسين حُسين .. لهلي يومية أحن
حُسين حُسين
يبو اليمة .. إمن اگولن ينفتح صدري
يبو اليمة .. السجن تعبني ما تدري
گرب أدري ترى البين ترى البين
أشوف اهلي ضوه العين العين
دعيت الله
____
توضيت ودرتها الكربلة عيني
وصحت يحسين وحدي لاتخليني
انه ابطامورة سودة خلصت اسنيني
واحسن بالقيود اتگطع ايديني
عذاب عذاب .. عمري يحسين انگضه
عذاب عذاب .. لبني أشتاگ الرضا
عذاب عذاب .. عمري منهو ايعوضه
عذاب عذاب
نهاري اظلم .. الضوه ما مر عله اعيوني
نهاري اظلم .. الشمس من عدها حرموني
أشوفنها بعد وين بعد وين
أشوف اهلي ضوه العين ضوه العين
دعيت الله
____
اللي يقرة ازيارة العاشر دريت آنه
يبو اليمة تحظرة وترفع أحزانة
قريت ازيارتك والروح لهفانة
أشوفنك عيوني اعليك عطشانة
أريد أريد .. يمي تحظر هالمسة
أريد أريد .. بس هواك اتنفسة
أريد أريد .. اتشوف وكتي اشگد قسة
أريد أريد
ردت نگعد .. واسولف همي لو شوفك
ردت نگعد .. وتسولفلى عله اطفوفك
انه ابگلبي چلمتين چلمتين
أشوف اهلي ضوه العين ضوه العين
دعيت الله
____
ردت من كربلاء اتراب تنطيني
أشمنة واصيحن آه يحسيني
ردت من جربة العباس ترويني
ردت وابخيمة الحره تغطيني
دموع دموع .. من اموتن رت اصب
دموع دموع .. الجسمك الظل عالترب
دموع دموع .. عالسبية التنضرب
دموع دموع
حلم عندي .. قبل ما موتن ابچيلك
حلم عندي .. عزاء ابلحدي اسويلك
حلم أللطم لطمتين لطمتين
أشوف اهلي ضوه العين
دعيت الله
____
عله اچفوفك أموتن أمنية عندي
يبو اليمة وبدينك ينحفر لحدي
علَي بعدوهم اهلي وابعدوا ولدي
دمع فرگاهم اشگد يحفر ابخدي
گضيت گضيت .. عمري وحدي ابلا أهل
گضيت گضيت .. سجني آهات وعلل
گضيت گضيت .. جسمي من سجني نحل
گضيت گضيت
بقيت انته .. أمل عندي تجي يمي
بقيت انته .. يجدي وفاطمة أمي
الفرح گلي يجي امنين يجي امنين
واشوف اهلي ضوه العين ضوه العين
دعيت الله
حيدر الحلفي
