#ياأمير_المؤمنين هايتراب . خذت احباب . من الروح ليش ابساع الع | الشاعر حيدر الحلفي

#ياأمير_المؤمنين

هايتراب . خذت احباب . من الروح ليش ابساع
العندي چان . أغلى انسان . راح وصار جوه الگاع
الوالد راح . الوالد راح . الوالد راح
أغلى انسان

هايتراب اتنگي اعزاز . من الروح ابچف جناز . ابنية او والد حيل اعتاز . ماتدري ماتدري
عمر الوالد خذتة وراح . ماظن لا يتراب ارتاح . شالوا جثتة وكلبي صاح . ياعمري ياعمري

ياحنيتة وذيچ الشبگة . الكل ليلة يشبگني اياها
يا چلماتة الحلوة الترفة . اتزيح اهموم الدنيا اوياها

يگضي الليل . دمعي ايسيل . بويه انصيح . ياكرار
اتصب العين . ويه إحسين . نگضي اليوم . وسط الدار
ما نرتاح . الوالد راح . الوالد راح
أغلى انسان
________
شالوا جثتة وگلبي انشال . ادموعي الفگدة اهواية اثگال . طشوا فوگ الغالي ارمال . ياوسفة ياوسفة
الفگد الوالد أبچي اعيون . شلون انعيش ابدونة شلون . بويه افراگك لا ميهون . اشگد كلفة اشگد كلفة

لا أم لا والد ضلينة . خويه إحسين الدنيا اظلمت
همي وهمك إلمن نشكي . ابواب الفرحة اليوم انسدت

دمع افراگ . عالما ضاگ . راحة ابيوم . خل نبچيه
گوم اوياي . خنطش ماي . الگبرة انروح . وانحاچيه
دمعك طاح . الوالد راح . الوالد راح
أغلى انسان
________
خل نگعد يم گبرة انوح . نشتم عطرة او تهدة الروح . اهواي اتحملنة احنه اجروح . بس جرحة بس جرحة
بلكت يسمع صوتك گوم . وگلة احسينك جاك اليوم . گلة اگليبي اشگد مهضوم . شيريحة شيريحة

بويه شلون الدارك أدخل . وما شوفك تتلگى احسينك
كل مصباح شلون اتحمل . وما تحظن إبنك چفينك

ردنه انشوف . بس اطيوف . وكت النوم . منك كون
بالأحلام . ردنة انام . ابحظنك ذاك . واحلى اعيون
عطرك فاح . الوالد راح . الوالد راح
أغلى انسان
________
زينب آنه وگلبي ايريد . يعرف مني الطف شيريد . باچر من يلزملي الإيد . بطفوفي بطفوفي
لو عباس ابصف الماي . طاح وما يلزم يمناي . منهو ايظل يابويه اوياي . ياخوفي ياخوفي

تحظر زينب لو ماتحظر . لو راح العباس إمن ايدي
أركض واعثر وانده بويه . ذبحوا أهلي حتى اوليدي

بين النار . ركضي صار . والأطفال . تاهوا وين
هذا ايطيح . هذا ايصيح . ذبحوا وين . عمه إحسين
بس اصياح . الوالد راح . الوالد راح
أغلى انسان
________
راس إحسين شلون انشوف . اتشيلة اهناك اشگد اچفوف . اشگد صبغوا من دمة اسيوف . وآنه انحب وآنه انحب
الشايل راسه ايعذب راد . گلب ارقية وكله اعناد . كلما گله إبعد غاد . يتگرب يتگرب

ريت اعيوني العندي يعمن . ولا شوف إحسين ابلا منحر
گلبي اشيتحمل يا بويه . وبالخيل انظر إبنك ينجر

عشر اخيول . مو معقول . تسحگ ليش . جسمة اتريد
اشگد طعنات . اشگد سحگات . صدرة ايشيل . وانته ابعيد
اشگد ارماح . الوالد راح . الوالد راح
أغلى انسان

حيدر الحلفي