محررررم 1444 هـ ( الأنصار ) أصحاب العمر يحباب الگلب. نمتوا اع | الشاعر حيدر الحلفي

محررررم 1444 هـ ( الأنصار ) أصحاب العمر

يحباب الگلب. نمتوا اعله الترب . وظليت ابغرب . يصحاب العمر
أنده ما تسمعوني . غمضتوا وتركتوني
يصحاب العمر . يصحاب العمر

غمضتوا وتركتوني بلا صاحب
وحدي ابقيت انه وحدي للمصايب
ما عاتبكم ابدن والله ما عاتب
ما قصرتوا بس گلبي الكم الذايب

يناسي .. فرگتكم صعبة اعلية
يناسي .. ردوا لحسين اشويه
يناسي .. اشسوت فرگتكم بيه
يناسي

غربة ابكربلة . اليبقى ابلا هله . وصاحب ما إله . ايون دوم اشكثر
وسفه ورحتوا من دوني . غمضتوا وتركتوني
يصحاب العمر . يصحاب العمر
________
مشتاگ الحچيكم والملامحكم
مشتاگ آنه احضننكم واصافحكم
إن چان الممات اكثر يريحكم
لتردون الي وگلبي يسامحكم

غفيتوا .. ومن الدنيا ارتاحيتوا
غفيتوا .. وبالتربان اتغطيتوا
عفيتوا .. المولاكم ما حنيتوا
غفيتوا

ارتاحيتوا او انه . ماشفت الهنه . وعيني امخزنه . دمعات وصبر
شيغمضهن اعيوني . غمضتوا وتركتوني
يصحاب العمر . يصحاب العمر
______
ابلا صاحب ترى الدنيا فلا تسوى
رحتوا وانكسر گلبي ترى توه
عالمره گضيناها وعلى الحلوه
خوتكم يأنصاري صدگ خوه

حبايب .. عشرتكم أجمل عشرة
حبايب .. ما زعلتوني مره
حبايب .. كل واحد ضحه ابعمره
حبايب

خوتكم صدگ . بيها اشگد عشگ . گلبي الكم يدگ . والكم ينتظر
أدري اشگد تحبوني . غمضتوا وتركتوني
يصحاب العمر . يصحاب العمر
_______
الروح اشگد عزيزة وقدميتوها
ما قصرتوا والأجلي نطيتوها
انحبك ياحُسين اشگد حچيتوها
ابدمكم عالصدر أدري كتبتوها

كتبتوا .. بدماكم حيل انحبك
كتبتوا .. انموت ونحيه احنه ابدربك
كتبتوا .. فدوات انروح الگلبك
كتبتوا

اشگد حبكم ترف . لا ماينوصف . اتجننتوا اعترف . بيه إمن الزغر
بالحب من گصدتوني . غمضتوا وتركتوني
يصحاب العمر . يصحاب العمر
____
جون وياحبيب اشگد أحن ليكم
ضحيتوا ابنفسكم وابأهاليكم
مشتاگ اگعد اوياكم واحاچيكم
وفيتوا لچن بيمن أوافيكم

وفيتوا .. لا ماقصرتوا اوياية
وفيتوا .. طحتوا وما طاحت راية
وفيتوا .. وانطيتوا الروح اكفاية
وفيتوا

وفيتوا العهد . ماعفتوني ابد . ما حصل بعد . منكم بالعمر
أرواح ونطيتوني . غمضتوا وتركتوني
يصحاب العمر . يصحاب العمر
_______
عابس ياجرح گلبي يالمعتبر
اتلگيت السيوف الخاطري او أكثر
طهرت التراب ابدمك الأحمر
ثوبك شگگيتة ابعشگك الأكبر

يعابس .. اشگد بيه انجنت روحك
يعابس .. ابإيدي طيبت اجروحك
يعابس .. مو ياهو الچان ايلوحك
يعابس

ابحبي اتجننت . وثوبك شگگت . روحك سلمت . لجلي وتفتخر
ابفرگاكم لچمتوني . غمضتوا وتركتوني
يصحاب العمر . يصحاب العمر

حيدر الحلفي