دكو صدرهم بالطفوف الأنصار.. وأنتخو أهل التضحيه والإيثار.. بالد | الشاعر حيدر مطر العبادي

دكو صدرهم بالطفوف الأنصار..
وأنتخو أهل التضحيه والإيثار..
بالدم كتبو عهدهم .. والعز ثوبه علكدهم
وأنتخو أهل التضحيه والإيثار ..
..........................................
ماهابو السبعين ألف هالسبعين..
وي المنايه تسابكو لأجل الدين..
جون وحبيب وعابس وأبن القين..
للموت ظلو عالعهد ويَ حسين..
أصحاب وياعزمهم .. شدّو بالطف حزمهم
وأنتخو أهل التضحيه والإيثار..
.....................................
الحر الرياحي شن عليهم غاره..
الكل سكت ظل يحجي بس بتاره..
بروس العساكر ياخذ أستخاره..
أبصوت صاح حسين أحنه أنصاره..
من كبّر الرياحي .. خله العدو أضاحي
وأنتخو أهل التضحيه والإيثار..
..................................
تقدم وهب كبّر وصوته عالي ..
بالموت وي حسين ما أبالي..
لأجل العقيده رخصت كل غالي..
نصراني بس بالطف صرت موالي..
اليوم بصافي نيه .. راح أشبك المنيه
وأنتخو أهل التضحيه والإيثار..
...................................
رجّف الحومه لمّن تقدم جون..
يحسين هذا أنه الموالي المجنون..
السبعين ألف هالصوت خل يسمعون.
أبسيفي أضرب كل منافق ملعون..
لحسين الضحه روحه.. جنة عدن مفتوحه
وأنتخو أهل التضحيه والإيثار..
..................................
ما قصرو بالحومه نعم الأصحاب ..
فخر العرب نعرف جميع الأنساب ..
زينب نختهم هوسو يم الباب ..
بالحومه أبد ماقصرو شيب وشاب ..
الحشد الحسيني جاهز .. نصبو اربع مفارز
وأنتخو أهل التضحيه والإيثار..
......................................
هذا الحشد بالغاضريه أشسوه ..
لروح النبي صارو حزام وتجوه ..
للدين والمذهب عمرهم فدوه ..
بجنة عدن كلمن عطش يتروه ..
بيده النبي يرويهم .. ماقصرو يدريهم
وأتتخو أهل التضحيه والأيثار
.................................
حيدر مطر العبادي