زينب الجانت أميره .. أميره .. هسه مسّبيه و أسيره .. أسيره .. و | الشاعر حيدر مطر العبادي

زينب الجانت أميره .. أميره ..
هسه مسّبيه و أسيره .. أسيره ..
وصلت الراسي الرمال ..راحت أيام الدلال
عكب الأخوان .. عكب الأخوان
......................................
أنه زينب والعساكر حركو علّيه الخيام ..
وأنه ماعندي محامي لا أخوان ولاعمام ..
شكد تمنيت المنيه وردت بالطف الختام..
كبل ماشوف بحياتي عالرمح راس الأمام ..
وآنه أعاين عالغوالي .. الغوالي ..
تذكرت ذيج الليالي .. الليالي ..
ألتفت يمنه وشمال .. راحت أيام الدلال
عكب الأخوان .. عكب الأخوان
.....................................
شتّموني وأنه زينب آه ياغدر الزمان ..
وآنه بت حيدر أبيه ماعشت ذل وهوان ..
صحت هوّن هالمصيبه ربي أنت المستعان ..
أدري من فاركت أخوتي فاركت حتى الأمان ..
شفت لوعات ومآسي .. ومآسي ..
الزمان وياي قاسي .. قاسي ..
وقسوته تهد الجبال .. راحت أيام الدلال
عكب الأخوان .. عكب الأخوان
.....................................
والله درب الشام حيره بالخرابه من نبات ..
وأحنه للعالم سفينه توصل البر النجات ..
الرمح شايل أماني وشايل شكد ذكريات ..
ردت وي أخواني أموت وياهم شمحله الممات ..
عالابو تسأل رقيه .. رقيه ..
وآنه مجتوفه أديه .. أديه ..
شرد أجاوب عالسؤال .. راحت أيام الدلال
عكب الأخوان .. عكب الأخوان
........................................
أخواني محزوزه المناحر وأنه مجتوفه الأدين ..
ينصدع كلبي من أعاين وين أنطي الوجه وين ..
ساعه أنظر كمر هاشم ساعه أنظر للحسين ..
شما انوح وياي ناحو ومن اون يعله الونين ..
وانه مابيدي وسيله .. وسيله ..
وناكتي عرجه وهزيله .. هزيله ..
وأيدي مخنوكه بحبال.. راحت أيام الدلال
عكب الأخوان .. عكب الأخوان
....................................
الذيج الأيام الجميله روحي تشتاك وتريد ..
وتذكر أيام الطفوله ويه الحسين الشهيد ..
شما أصد عالكافل أنظر منحره ودم الوريد ..
تكبر بعيني المصيبه وصبري عالمحنه يزيد ..
كافلي الروحه حنينه .. حنينه ..
السهم نابت بعينه .. بعينه ..
والدمع من عينه سال .. راحت أيام الدلال
عكب الأخوان .. عكب الأخوان
....................................
بالصلاه أرفع أديه وأدعي ربي بكل قنوت ..
كبل ما شوفن شماته يا آلهي خل أموت ..
ما أنوح بصوت عالي كمت أوّن وأبجي بسكوت ..
خاف تسمعني اليتامه ويرتفع من عدهه صوت ..
تصرخ أيتامك يبابه .. يبابه ..
حتى من بتنه بخرابه .. بخرابه ..
تصيح يابابا تعال .. راحت أيام الدلال
عكب الأخوان .. عكب الأخوان
...................................
حيدر مطر العبادي