ششد منهن والجروح هوايه .. راح أشدّهن يالكمر بالرايه.. جروحك ال | الشاعر حيدر مطر العبادي

ششد منهن والجروح هوايه ..
راح أشدّهن يالكمر بالرايه..
جروحك التنزف ضوه .. ألهه مايرهم دوه ..
...........................
والله محتاره شداوي جرح أكبر من جرح ..
دموعي لوسالت أخاف تصب على جروحك ملح ..
تدري زينب يالكفيل بوجهك أتشوف الصبح ..
لو نويت تروح عنهه بسيف هجرك تنذبح ..
يبو فاضل لو رحت يالغالي ..
الموت والله بفركتك يحلالي ..
تضيع نسمات الهوه .. ألهه مايرهم دوه ..
راح أشدّهن يالكمر بالرايه ..
.........................
أنه ماشفت بحياتي كمر وبعينه سهم ..
الضوه مضيّع طريقه الدنيا ظلمه من الألم ..
ياحلم كل اليتامه والحلم أصبح وهم ..
ضاعت الأحلام كلهه وطاح شيال العلم ..
يبو فاضل حيل ماترضاهه ..
تمشي زينب والشمر وياهه ..
ويّه ذباحك سوه .. ألهه مايرهم دوه ..
راح أشدّهن يالكمر بالرايه ..
.........................
كل كتر ينزف أشوفه وما نفع بيهن ضمد ..
ششد منهن يابو فاضل والجروح بلا عدد ..
الأسد يمشي على جرحه أدري من طبع الأسد..
بس ردت ترجع أليه وكلشي ماريدن بعد ..
شِلي بعمري لو بعد ما شوفك ..
بعيني شفت مكطعات أجفوفك ..
شابك عليهه اللوه .. ألهه مايرهم دوه ..
راح أشدّهن يالكمر بالرايه ..
.............................
اشلون أشد جرح البعينك والسهم بيهه أنكسر ..
لو أداوي أجفوف أديك الكطعوهن عالنهر ..
من أشوف سهام صدرك ياكفيلي أشبع قهر ..
أجروحك مبينه عليه وحدّبت حتى الظهر ..
كمت بالكوه أجر بأجدامي ..
يانهر وشلون أشوفك ضامي ..
الماي بجفوفك روه .. ألهه مايرهم دوه ..
راح أشدّهن يالكمر بالرايه ..
..............................
ياذخر أم البنين ومفخرة حامي الحمه ..
أشلون مرمي على الوطيه يالمكانك بالسمه ..
كوم وأنهض ياكفيلي بداعت أمك فاطمه ..
كون أموت ولاأشوف اللحيه تتكاطر دمه ..
أنت جثه عالثره ومطروحه ..
وآنه كلبي مايبطّل نوحه ..
بفركتك كلبي أنجوه .. ألهه مايرهم دوه ..
راح أشدّهن يالكمر بالرايه ..
.................................
حيل أذاني مصابك من طحت عالمشرعه ..
بالسهم مصيوب جودك والجفوف مكطعه ..
مات أبو فاضل يزينب أسمع الناعي نعه ..
ودمعه يهمل عالمصيبه بصوت ينعى الفاجعه ..
كتله ياناعي المصيبه أحجيلي ..
أبو فاضل فركته تهد حيلي ..
طشرتنه نينوه .. ألهه مايرهم دوه ..
راح أشدّهن يالكمر بالرايه ..
....................................
حيدر مطر العبادي