كعديه حسين من فاركني شوف شصار بيه .. جان اسمي أم الخدر هسه ال | الشاعر حيدر مطر العبادي

كعديه
حسين من فاركني شوف شصار بيه ..
جان اسمي أم الخدر هسه السبيه ..
عشت لوعات المصاب ..
وروحي ما تحمل غياب ..
شصار بيه ..
..................
بلوعة المفجوعه أحجي وأروي أهات المصيبه ..
مغوركه عيوني بدمعها و أدري بالراح شيجيبه ..
كل هلي راحو و أخوتي وبقت زينبهم غريبه ..
مسبيه أسحك عالجمر .
والصبر مل مني الصبر .
بالحلم لو واحد يمر .
والكلب يكطع نحيبه ..
شلون أركب ناكه وأنه الهاشميه ..
والشمر يضربني وآنه أشكف بأديه ..
من الفجيعه كلبي ذاب ..
وروحي ما تحمل غياب ..
شصار بيه ..
...................
أبتدت مأساتي وغربتي وأنه عالتل أنتظرهم ..
من أنذبح أبن أمي ضامي و عالصدر كاعد شمرهم..
وكافلي يم الشريعه وفاح بالحومه عطرهم ..
حسين مكطوع النحر .
وطاح الجبل يم النهر .
يدروني ما أحمل قهر .
ريت من عمري لعمرهم ..
راحو أخواني وبقت دنيانه ظلمه ..
ومنحده الشامت ضعنه والله هضمه ..
حتى رمش عيوني شاب ..
وروحي ما تحمل غياب ..
شصار بيه ..
...........................
جنت أمني الروح هلبت عيوني متوهمه بنظرهه ..
الحرم من الخوف والله تموت لو سمعت خبرهه ..
أتحضرن لسياط أميه لو خيمنه يشب جمرهه ..
طشينه كلنه بالفله .
من ضيمنه وذاك البله .
اللاه يعملت كربله .
ماتفاركني صورهه ..
أبد ما أنسه المصايب والأذيه ..
وأنه اكومن وأنهطر وأنظر رقيه..
ومولح عيوني التراب ..
وروحي ما تحمل غياب ..
شصاربيه ..
............................
الصخر حن ونعانه وما يحن كلب آل أميه ..
حايره الأطفال ظلت عاتكه وسكنه ورقيه ..
أذكرت بصباي الجرالي سولفت عنهه الزجيه ..
وصتني أمي فاطمه .
لو سالت دموعج دمه .
اتوجهي لرب السمه .
وأدعي ربج كل مسيه ..
صحت يا ربي دخيلك هون الصار..
بعد مابيهه اليتامه تحمل أخطار ..
ربي أنت المستجاب ..
وروحي ما تحمل غياب ..
شصاربيه ..
...............................
لوردت أشرح أحوالي بالوصف يعجز كلامي ..
الشمر يحدي الضعينه والنحر مرفوع دامي ..
عالرمح راس أبو اليمه شلون أوصلّه سلامي ..
ألف وسبعمية جرح .
يلتفت ويلجمه الرمح .
موقف أبد ماينشرح .
عالرمح صله أمامي ..
أستقبل القبله وبجه ودمعه يلالي ..
وجني أسمعه يكول يازينب تعالي ..
يختي رديلي جواب ..
وروحي ما تحمل عذاب ..
شصاربيه ..
..........................
لو ميته جان أهون ألي ولا شفت ضحكة شماته ..
تتضاحك أشباه الزلم والعليل توّن خواته ..
ومن جابو الراس بطشت ماتت رقيه بمماته ..
عالابو من ظلت توّن .
مليانه أهات وحزن .
خلوهه وياه تندفن .
عالطشت ماتت رقيه وننشتم تالي حياتي ..
..............................
حيدر مطر العبادي