ذيج الأماني صارت أحلام .. بوادي السلام الخدمو العام .. ذبلانه | الشاعر حيدر مطر العبادي

ذيج الأماني صارت أحلام ..
بوادي السلام الخدمو العام ..
ذبلانه هسه أزهارهم .. ظلت خليه ديارهم
وين الأعزاز .. وين الأعزاز
........................................
اليدفن أعزازه يعالم بعد شله بهالعمر ..
الفركه صعبه والثواني تجوي بي مثل الجمر..
ذيج الأيام الجميله أشلون ندفنهه بكبر ..
وصارت الوسعه زغيره أمنين أجيبك ياصبر ..
كون البواجي ترجع الراح ..
جا أبجي دمع أعيوني وأرتاح ..
عالضيعينه أخبارهم .. ظلت خليه ديارهم
وين الأعزاز .. وين الأعزاز
..................................
اليحضر ويانه المجالس كل سنه ودمعه يصب ..
ظل مكانه هسه خالي بالكبر جوه الترب ..
أشلون نتحمل غيابه ليل المفارك صعب ..
هوه بأرض النجف لاكن صورته بنص الكلب ..
ظلت صورهم يمنه تذكار ..
والكلب جمره وتستعر نار ..
عمر الورد أعمارهم .. ظلت خليه ديارهم
وين الأعزاز .. وين ألاعزاز
..................................
كل سنه بهاي الليالي تون وتهل الدمع ..
راح شادود العزاء الحيل يلطم عالضلع ..
بليلة الوحشه يغالي دكعد وأعلك شمع ..
ندعي ربنه وياك كون بجنة الله نجتمع ..
بالكلب آه وحسره وهموم ..
الفاتحه نقراهه كل يوم ..
النكعد بفيّ أشجارهم .. ظلت خليه ديارهم
وين الأعزاز .. وين الأعزاز
...............................
بأريعين حسين باجر نمشي منقوص العدد ..
صاحب الموكب شكله بالله لو عنك نشَد ..
لو معازيبك تخابر هم طلعتو لو بَعد ..
يبقه دمع العين يحجي وأبد ما سولف أبد ..
هاي السنه نهديله خطوات ..
حاضر ويانه وأبد مامات ..
بسد علي نامو جارهم .. ظلت خليه ديارهم
وين الأعزاز .. وين الأعزاز
...............................
صح خسارتنه جبيره راحو الكلهم وفه ..
عليهم الصحبان تبجي والخدم متوسفه ..
راحو الكلهم حميه ونورهم غفله أنطفه ..
كل زياره وكل محرم بالمواكب واكفه ..
بدرب الزياره توزع الماي..
نصهم خدم والباقي مشاي ..
العزبو زوارهم .. ظلت خليه ديارهم
وين الأعزاز .. وين الأعزاز
.................................
والله هنياله الختمهه بهيج تاريخ واسم ..
كلهه تترحم عليه أطفال نسوان وزلم ..
تنشد عليه اليتامه وين صاحبنه الشهم ..
خيره متبدي وعليهم راسم البسمه رسم ..
وينك يغالي جانه عاشور ..
عله حسين أبجي بنص الكبور ..
يالتنحسب خطارهم .. ظلت خليه ديارهم
وين الأعزاز .. وين الأعزاز
......................................
حيدر مطر العبادي