خۏشام‌کیم دمبَدم گریان‌گؤزوم اۏل خاک پادان‌دیر زیانی اۏلماز اۏل گؤز یاشینین کیم توتیادان‌دیر دمادم مردم چشمیم، ایچر قان زلف و خالیندان بلی اکثر معاشی اهل دریانین قارادان‌دیر دئمه فرهادقانین تؤکموش آنجاق عشق‌شمشیری منیم گؤر قانلی یاشیم کیم، بو هم اۏل ماجرادان‌دیر معنبر سونبولوندن آلمادان بو، اۏلمادیم رسوا بو رسوالیق منه سندن دئییل، باد صبادان‌دیر حباب اشک ایچینده، موی ژولیدم‌ده خوشحالم باشیمدا بو همایون سایه اۏل عالی بنادان‌دیر وفا رسمین اونوتموشسان دئیه، اینجیمه‌زم زیرا بو کیم مندن جفا کم ائیلمزسن هم، وفادان‌دیر کمال حسن مشرب عالی اۏلماقدیر تعرُّض‌دن ریا اهلینه هم، چۏخ اعتراض ائتمک هم ریادان‌دیر فضولی تؤکمه چۏخ یاش احتیاط ائت، گئتمه‌سین ناگه گؤزوم‌دن سۆرمه کیم، خاک ره اهل صفادان‌دیر #فضولی @El_Oba @hekim_fuzuli 4.0K views01:34
