#تراث زيـنب لفت للـحادي او گالتله يحادينه مر ابحـومة الميدان | تراث القصائد الحسينية
#تراث
زيـنب لفت للـحادي او گالتله يحادينه
مر ابحـومة الميدان حتى انودع اهالينه
ــــــــــــــــــــــــــــــــــــــ
الله اعـليـك يـا حـادي مـر بـيـنـه اعـلى وليـانه
ووچب بـالهزل ساعه وبمسراهـن اتـوانـه
نـريد انـودع اهـالينه او نخـبرهم ابممشانه
يحـادي (الحـرم) مهظومه
اونريد انـروح للـحومه
نشـوف اهـلي تظل نومه
يو تنهض تلوح الخيل ويانه اوتبارينه
ــــــــــــــــــــــــــــــــــــــ
هـاي النـوگ مهزوله اوحدج ما تِلتَگه اعـليها
يحـادي اشـلـون نـركبها ونأمن تمشـيـها
نريد انـروح للـوليان نخـبرها اونحاجيها
مــرنه اعـلى المسنايه
وأّگف يم صاحب الرايه
نشـوف الضيغم اشرايه
يرضه ابولية العدوان ابوفاضل يخلينه ؟
ــــــــــــــــــــــــــــــــــــــ
ما نگدر نروح اوياك یا حادي اعلى هالحاله
نطب اعلى (ابن مرجانه) ابذل اليسـر وحباله
نریدانشوف اخوی احسين عـدمن ودع اعياله
ياهو اللي يباريها
لوسـار الظــعن بـيها
الكوفه اشلون اطب ليهـا؟
واشوف الوادم ابـعيني واحنـه الـظـيـم عـالينه
ــــــــــــــــــــــــــــــــــــــ
اسـولفلك يهـا الحـادي لمن چنت بالكوفه
ابويه اعلى الخلگ سلطان بيامه المعروفه
مـن يـجـبـل عـليها (العيد) تحب الوادم اچفوفه
یگلوله نســانه اتريد
تعيد (زينب ابها العيد)
تحب مـنها الجدم والأيـد
مـنـك نـطلب الرخـصة ( تـعايدها) او تـرد ليـنه
ــــــــــــــــــــــــــــــــــــــ
(ابوي) الفحـل ما يـرضه يـرخـصهن يعيدني
خـايف للـزلم يـرحن او يحچـن مـن يشـوفني
مـن ذاك الخـدر لنهـن يسمـعـن عـالهزل وني
يحـادي المـوت أشـوالي
اولا تتشمت ابحـالي
شگـلها التـوگف اگبالي
اوتنشدني اعـلى وليـاني اوعن ذاك الخـدر وينه ؟
ــــــــــــــــــــــــــــــــــــــ
الحـادي مـن سمـع زينب مر بالضعن عالحومه
زيـنـب شـافت الوليـان كـلـهـم عـالأرض نومه
تــــتهاوه الحــرم گـامت والعـبـرات مسـجومه
او زيـنـب تجـذب الونه
تگـلهن گومن امشـنه
لعـد النهر نتعنه
نريد (الجـابنه) لهـنا هـوه اللي يـودينه
ــــــــــــــــــــــــــــــــــــــ
اخـذت زيـنـب العـيله اوراحت للمسنایه
وگــفت يم (ابـو فاضل) اوشـالت بـيدها الرايـه
صاحت گـوم يـا عـباس لخـــــتك راحت اسـبايه
لحد يسبع الگطره
نايم يخـويـه اعـلى الثره
إخـتـك خـذوها اميسره
ــــــــــــــــــــــــــــــــــــــ
يـا عـبـاس مـانـي اخـتك واجـيـت انـخـاك يـالوالي
اگعد نشـف ادمـوعي اوعـاين لعـد ذل حـالي
يـخـويـه نـاگـتي (عجفه) او شمـر اوزجـر يـبرالي
إنهـض يحـداي الظعـن
سـدر خـواتك للوطن
عكبــك يـعباس انـولن
ــــــــــــــــــــــــــــــــــــــ
يخـويه النـوگ مهزوله اوشمـر اوزجـر يـبـراهـا
عـريّه ابـلا حـدج كلها اوتــــــتعثر ابممشاها
مـن تـوگع يتيمه الكـم ياهـو البعـد يـتناها
وزنودي مجتوفه ابحبل
يا طفله اباري او يا طفل
متحيره اودمـعـي يـهـل
ــــــــــــــــــــــــــــــــــــــ
ماچان ایخطر عـالبال يـا عـبـاس تـنساني
او تظل اعـلى النهـر نـايم فـدوه اتـروح (ذرعـاني)
يبو فاضل (الذرعانك) واروح ابـيسـر عـدواني
(اوعيني) لعد (عينك) فـده
بـالحومه يمچيد العـده
عـگــبك ولونـه اهـل الرده
ظلينه عكب عينـك ندور اعـلى اليحامينه
عبد الحسين الشرع
#اللهم_عجل_لوليك_الفرج
(135)
