لو أكَضي كل عمري أون ما يكفي عالكاظم حزن شاء الله | الشاعر حيدر حسين الگرعاوي

لو أكَضي كل عمري أون ما يكفي عالكاظم حزن
شاء الله يرفع رايتك يالماكو مثل مصيبتك
******
الماشي عد كل البشر لو ينسجن عدهم أحد
ما تكَطع اهله زيارته ويزوره يومية الَولد
بس أنته يبن المصطفى مثلك فلا شفنه أبد
بطامورة سجنك سيدي ومو هذا مولاي الأشد
دوم الحديد بركَبته ياويلي ماكو بمحنته
موحكَها تلطم شيعتك يالماكو مثل مصيبتك
******
بقعر السجون المظلمة البيها أختنكَ حتى الهوه
كَــالو عيونــك سيدي ما شاهدن بيها الضوه
كون المثل شخصك مَلك لا أعلى من هالمستوه
وكون الشمس تسجد أله الكون بخدمته شما حوه
الدنيا هذي والفلك مو الله خالقهن ألك
للحشر تبقه محبتك يالماكو مثل مصيبتك
******
آنه ادري عشت الواقعة من كَيدوك بسلسلة
السجاد مر بخاطرك؟ المسبية بت عقد الولة
أنته بسجن تحت الأرض بس عشت محنة كربلة
نفس السلاسل سيدي الخلوها بيد العايلة
بس ما نزف نحرك دمه ولا ألك عيلة ميتمه
ما ننسة زينب عمتك يالماكو مثل مصيبتك
******
الفرق شاسع سيدي ما ضربو بضعنك مرة
لا حركَو خيامه العده ولا ظل يويلي على الثرة
ما ذبحو بحضنك طفل ولا لك أخت متيسرة
بالكافل شكَد انتخت وما جاها سبع الكَنطرة
لو شفت حالة مصرعة يمكن تكَع عالمشرعة
ماريد أهيج لوعتك يالماكو مثل مصيبتك
*******
عنكم أبد ما ننمنع خلهم يفجرون الدرب
طلعت زلمهم بس حچي يالكاظم بسوح الحرب
خيطهم خياط الحشد ذبت عكَلها من الرعب
أبن الوطن عدهم عدو يطربون همه على الغُرب
همه الرضو والمارضو وشما بديهم عضعضو
لا ما نعوف زيارتك يالماكو مثل مصيبتك
*******
بالمهدي هم عندك علم طول علينه بغيبتــه
محد أخذ ثــارك بعد يمته يجينه برايتــه
لسه البقيع مهدمه والدنيا تبجي لشوفته
خافن يرد طف كربلة ويسبون زينب عمته
يالما مثل صبرك صبر يالمهدي كَلي شتنتظر
نتنطر شكَد طلعتك يالماكو مثل مصيبتك
*******
حيدر حسين الكَرعاوي