ميمر ... ما تدري يا ساعة تموت بالك تأمن بيهه ****** | الشاعر حيدر حسين الگرعاوي
ميمر ...
ما تدري يا ساعة تموت بالك تأمن بيهه
******
يبن آدم أحذر لا تغــرك دنيــــاك
من تموت بس أعمالك تروح وياك
من يدفنونك كلــها باچــر تنســـاك
يومين يبچون عليك تنسه البشر تاليهه
******
يبن آدم من المــاتو أخذ العبرة
يا ميت علينــه رجــع من كَبره
بالزين هنيــــاله اليخَلص عمرة
والوادم التزرع خير يترحمون عليهه
******
لا تجرح أحد وأنتبــــه للسانك
إن صنته صانك وَإن هنته هانك
الناس خلـــهه تسولف بأحسانك
يبن آدم شكَد تعيش لا تغركَ بشاطيهه
******
خل مَحضرك لمن تطب محضر خير
من تحكم على الناس مو طاغي تصير
يمـــكن بأمــــوالك تحصــــــــل تقدير
عد الله ما تاكل هاي لو كَصتك چاويهه
******
أنطـــي الفقير ولا تردلك مسكين
اهواي مـــاكو ابيتهم چف طحين
كل أحنــــه يا هالناس باچر ميتين
الله يضاعفلك هاي وهناك ألك ينطيهه
******
البعض لســـه الناس تلعن بيهم
چي ما يشَرف أي بشر ماضيهم
والبعض لا يترحمـــــون عليهم
ربولهم خوش أولاد هنياله المربيهه
******
بكتـــابك العد الله كلشـــي مسجل
كل توبه ماكو ومنه أبد ما نخجل
شتتوقــــع من تموت باچر تعدل
من الدنيا تطلع عريان ولغيرك تخليهه
******
محد يفيدك باچر انت من تموت
متــــرين كَبرك وحَدك بيه تفوت
الحافــــي والي يمتلك عشر بيوت
نفس اللحد والدفــــان هنا قصتك ينهيهه
******
لا تترك أهل البيت همــــه الرحمه
الخدمــة التفيدك لا تعوف الخدمــة
كَــل لليــــعيل عليك مبري الذمــــة
يشفعلك هناك حسين لو زينب تواسيهه
******
حيدر حسين الكرعاوي
