يتيمة الحسين العليلة ظــاله المن ماختني ويــاكم الدار تب | الشاعر حيدر حسين الگرعاوي
يتيمة الحسين العليلة
ظــاله المن ماختني ويــاكم
الدار تبچي عليه من فركَاكم
تخاف لا اصيرن سبية بويــة موماخذ رقية
******
شكَال كَلبك يبو اليمه من عفتني
حتى عبدالله اخذتــه وما خذتني
زغيره بس انت يبويـة الشيبتني
تكَـــول مو بنتي اذا هسه شفتني
من يجينـــي المغرب يبَچينــي
من رحت كل ساعة ألطم عيني
والله تانيت المنية بوية موماخذ رقية
*****
ها يرد ها ما يرد احچي ويليلي
روحتك يحسين مو مالت تجيلي
ويلي من هذا السفر بوية يويلي
شكثر من طف كربله خايف دليلي
ساعة اتخيل عســــاكر بيهه
ساعة اشوفن عمتي سابيهه
خايفة من الغاضرية بوية موماخذ رقية
*****
أكَعد على الباب يوميه واتاني
ادعي ومأيسة يرجعكم زماني
من رحت ماتت بعد كل الأماني
ميته من يوم المشيتو من عساني
شكثر مشتاكَه اشوف عيونك
خاف بويـــة بكربله يذبحونك
وتنفجع بيك الزچية بوية موماخذ رقية
*****
أهون من الفركَــــه يابوية المنية
هم ترد أيامنـــه ونكَعد سويــــــة
مدري بوية منين أجتني الغاضرية
ألطم بوجهي كَمت صبــح ومسيــة
من رحت لليوم ما مرتاحة
الفاكَد من يموت يشبع راحة
ما كَلت بتي خطية بوية موماخذ رقية
*****
خاف أظل بالبيت أموت عليك حركَه
أطلــع من الدار أحس الدنيا خنكَــه
من يكَف كَلبـــي يبوية عليك حكَــة
مال حضنك آنــي لا مو مال فركَـــة
صفنه تاخذني وتردني الثانية
مأيسه منكم بوية بس متانية
هيچ وتردون ألية بوية موماخذ رقية
*****
ويلـــي من باجر يبويـــة الله ساتر
كَمت أشوف بنومتي رماح ومناحر
جسد مدري ألمن تدوس علي حوافر
بالطفوف أخيــام محروكَـــــه ومقابر
بعد ما بيهن بواچـــــي عيوني
تخاف بوية على الهزل يسبوني
حتى لو شدو اديـــة بوية موماخذ رقية
*****
حيدر حسين الكَرعاوي
