يوم الأموتن آني يحسين لا تنساني ********************* | الشاعر حيدر حسين الگرعاوي

يوم الأموتن آني يحسين لا تنساني
*********************
هــــاي أيــــــام العمر معدودة
چم سنه وتركض ركض محدودة
نمشــــي لله بالصحيفــة السودة
باچر عليك البـــــشر محسودة
يا قبلتي وقُرآني يحسين لا تنساني
*********************
هناك لمن تنكَطـــــع أنفاســـي
كل عمل ما عندي يرفع راسي
لمن يدفنونــــي ترجــع ناســي
أدري حُبك ما يخيب أحسـاسي
ما عندي غيرك ثاني يحسين لا تنساني
*********************
سيدي بالـــغفله أخلص يومـي
تنقبل ما ظن صلاتـــي وصومي
هذا أكبر عندي كل همومـــــي
المغيسل من يذب هدومـــــي
وأتهَيــــئ لدفاني يحسين لا تنساني
*********************
الناس لو مــات البشر ينسونــه
أنـعم الله لــمن يشيــــعونــــــه
تالــي يندَم من يغمض عيونـــه
كلها ترجــــع لمـــن يدفنونــــه
حتى أبنيِ وخواني يحسين لا تنساني
*********************
هيــه چم يوم ويخَلص عمــري
يركض الحفــــار يحفر كَبـــري
شراح أشوفن لو متت ما أدري
يخرَس لسانـــي ويفشــل عذري
ألمن يروح الجاني يحسين لا تنساني
*********************
عالم البرزخ عجيبـــة أهوالــــه
المثلي يامـــولاي منهو بحالـــــه
من يسئلونــــه على كل أعمالـــه
سيدي التشفعلـــــهَ ألف هنيالــــه
وهناك أظل متـــاني يحسين لا تنساني
*********************
مأمــن ومطمئن بيك هوايـــة
وأدري ما تنســاهه باچر هاية
من شلت يحسين بيدي الرايـــة
بأربعينـــك من رحت مشــــاية
وشكثر بيها نعــاني يحسين لا تنساني
*********************
أدري يابو اليمه عندك كافــي
بالزيــــارة من أجيلك حافــــي
منهو غيرك يا حسين يوافــــي
كَلب ما عدنــه وحكَكَ صافــــي
وما وآثق بأيمانـــي يحسين لا تنساني
*********************
زينب أختــــك يوم ما ننســـاهه
أحنه كل عاشـــور نبچي وياهه
بكَد محمد جــاه الله أنطـــــــاهه
وباچر بيوم الحشــر بحمــــاهه
ويــاك تتلكَــــاني يحسين لا تنساني
*********************
عهد للمحشر عزائـــــك دائم
واللطم يبقـــــه لظهور القائم
ما يهزهم شيعتك أي ظــــالم
بالسنين المرت الله العـــــالم
وي الحشد تلكَانـي يحسين لا تنساني
*********************
حيدر حسين الكَرعاوي


https://t.me/hhaaiiddeerr2019